Read Tzeltal Salmos 135 Bible Online

Salmos 135 - Tzeltal bible

Salmos 135

¹¡Aleluya! Halbeyahic yutsil sc'oblal te sbihil te Jehová, halbeyahic yutsil sc'oblal, ha'ex a'batex yu'un,

²ha'ex te ayex ta sna Jehová, ta amaq'uetic ta sna te Dios cu'untique.

³Halbeyahic yutsil sc'oblal te Jehová, como lec yo'tan; c'ayojtayahic c'ayojetic ta stojol, como ay yutsil yo'tan,

⁴como te Jehová la stsa Jacob te ha yu'un ya xc'oht, la stsa te Israel scuenta yu'un ha sc'ulejal ya xc'oht.

⁵Jna'oj te ha muc' te Jehová, te Cajwaltic c'ax hich smuc'ul a te bin ut'il spisil te diosetique.

⁶Te Jehová ya spas spisil te bintic ya sc'an ya spas, ta ch'ulchan, ta bahlumilal, ta maretic soc spisil sc'ubulil.

⁷Ya shach tal tocaletic c'alal ta sti'il bahlumilal; ya sticon tal te tsantsehwaletic soc te ha'al, soc ya sloq'ues tal te ic' ta stsobojibal.

⁸Ha la yac' lajuc te ba-alaletic yu'un Egipto, yu'un ants-winiquetic soc yu'un chambahlametic.

⁹La sticon tal señahiletic soc jchahp a'teliletic ta awohlil, ha'at Egipto, ta scontrahinel te faraón soc spisil te a'batetic yu'une.

¹⁰Bayel nacionetic la slajinlan soc la smilticlan ajwaliletic te bayel yipic:

¹¹ha te Sehón, ajwalil yu'un te amorreohetic, te Og, ajwalil yu'un Basán, soc spisil te ajwaliletic ta Canaán.

¹²Te sq'uinalic la ya'be yich' hilel te Israel, te pueblo yu'une.

¹³¡Jehová, sbahtel q'uinal ay te abihile; ta cajalcaj ts'umbalil ayat ta na'el!

¹⁴Te Jehová stojil me ya schahpan te pueblo yu'un, ya me sna'be yo'bolil sbahic te a'batetic yu'une.

¹⁵Te loc'ombahetic yu'un te nacionetic pasticlambilic ta plata soc oro, ha ya'tel sc'ab winiquetic.

¹⁶Ay yehic, pero ma xc'opojic; ay sitic, pero ma x'ilawanic;

¹⁷ay schiquinic, pero ma xya'iyic c'op; soc ma ba ya yich'ic ic' ta yehic.

¹⁸Te mach'atic la spasic, pajal ayic soc, ha nix hich spisil te mach'atic ha smuc'ulinej yo'tanic.

¹⁹Pueblo Israel, ¡halbeyahic yutsil sc'oblal te Jehová! Sts'umbal Aarón, ¡halbeyahic yutsil sc'oblal te Jehová!

²⁰Sts'umbal Leví, ¡halbeyahic yutsil sc'oblal te Jehová! ha'ex te awich'ojic ta muc' te Jehová, ¡halbeyahic yutsil sc'oblal te Jehová!

²¹C'alal Sión ac'a yich' halbeyel yutsil sc'oblal te Jehová, te mach'a nahinem ta Jerusalén. ¡Aleluya!