Read Tzeltal Salmos 136 Bible Online

Salmos 136 - Tzeltal bible

Salmos 136

¹Halbeyahic wocol te Jehová, como lec stuquel, como sbahtel q'uinal ay sc'uxul yo'tan.

²Halbeyahic wocol te Dios yu'un te diosetic, como sbahtel q'uinal ay sc'uxul yo'tan.

³Halbeyahic wocol te Ajwalil yu'un ajwaliletic, como sbahtel q'uinal ay sc'uxul yo'tan;

⁴te ha nax stuquel ya spas muc' yutsil a'teliletic, como sbahtel q'uinal ay sc'uxul yo'tan;

⁵te la spas te ch'ulchan ta scuenta sp'ijil yo'tan, como sbahtel q'uinal ay sc'uxul yo'tan;

⁶te la slim bahel te lumq'uinal ta sba ha'etic, como sbahtel q'uinal ay sc'uxul yo'tan;

⁷te la spas te bin muq'uic te ya sacubtesic q'uinal, como sbahtel q'uinal ay te sc'uxul yo'tan:

⁸ha te c'ahc'al yu'un ya scuentahin te c'ahc'alel, como sbahtel q'uinal ay te sc'uxul yo'tan,

⁹te u soc te eq'uetic yu'un ya scuentahinic te ahc'abal, como sbahtel q'uinal ay te sc'uxul yo'tan.

¹⁰Ha te mach'a la yehchentes te ba-alaletic yu'un Egipto, como sbahtel q'uinal ay sc'uxul yo'tan;

¹¹te la sloq'ues ta Egipto te Israel, como sbahtel q'uinal ay te sc'uxul yo'tan,

¹²ta scuenta yip sc'ab soc te sc'ab shachoj, como sbahtel q'uinal ay sc'uxul yo'tan;

¹³te la ya'be sjam sba te Mar Rojo, como sbahtel q'uinal ay te sc'uxul yo'tan,

¹⁴soc la yac' sohluc tey a te Israel, como sbahtel q'uinal ay sc'uxul yo'tan;

¹⁵pero la yac' muhluc ta Mar Rojo te faraón soc te soldadohetic yu'un, como sbahtel q'uinal ay sc'uxul yo'tan.

¹⁶Te mach'a la yic' bahel ta jochol taquin q'uinal te pueblo yu'un, como sbahtel q'uinal ay sc'uxul yo'tan;

¹⁷Te mach'a la yehchenteslan scuenta lajel muc'ul ajwaliletic, como sbahtel q'uinal ay sc'uxul yo'tan;

¹⁸soc la smil ajwaliletic te bayel yipic, como sbahtel q'uinal ay sc'uxul yo'tan;

¹⁹ha te Sehón, te ajwalil yu'un amorreohetic, como sbahtel q'uinal ay sc'uxul yo'tan;

²⁰soc te Og, ajwalil yu'un Basán, como sbahtel q'uinal ay sc'uxul yo'tan;

²¹soc la ya'be yich'ic hilel sq'uinalic, como sbahtel q'uinal ay sc'uxul yo'tan;

²²ha la ya'be yich' hilel Israel te a'bat yu'une, como sbahtel q'uinal ay sc'uxul yo'tan.

²³Te mach'a la sna'otic te c'alal ayotic ta wocol a, como sbahtel q'uinal ay sc'uxul yo'tan;

²⁴te la scoltayotic ta sc'ab jcontratactic, como sbahtel q'uinal ay sc'uxul yo'tan.

²⁵Te mach'a ya ya'be swe'el spisil bintic cuxajtic, como sbahtel q'uinal ay sc'uxul yo'tan.

²⁶¡Halbeyahic wocol te Dios yu'un te ch'ulchan, como sbahtel q'uinal ay te sc'uxul yo'tane!