Read Tzeltal Salmos 138 Bible Online

Salmos 138 - Tzeltal bible

Salmos 138

¹Ha salmo yu'un David. Ya calbat wocol, Jehová, ta spisil co'tan; ta stojol te diosetic ya jc'ayojtaybat c'ayojetic.

²Ya jquejan jba, ya cac' bahel jsit ta stojol te ch'ul Templo awu'un, ya calbat yutsil sc'oblal abihil yu'un te sc'uxul awo'tan soc te stalel jun awo'tan, como la atohytesbe sc'oblal abihil soc ac'op ta stojol spisil bintic ay.

³Te c'alal la jcawtayat, la ajac'bon jc'op; la awa'bon xan yip co'tan.

⁴Spisil te ajwaliletic ta bahlumilal ya me yalbat yutsil ac'oblal, Jehová, te c'alal la ya'iyic te bintic awaloje.

⁵Ya me sc'ayojtaybe yutsil sc'oblal te behetic yu'un Jehová, como muc' te yutsilal te Jehová,

⁶como toyol ay te Jehová, ya yil te mach'a peq'uel ay, yan te mach'a stoyoj sba, namal ya yil stuquel.

⁷Te c'alal ya xc'axon ta yohlil wocol, ha'at yac awac' cuxajucon; yac ahach ac'ab ta scontrahinel te yilimba te jcontratac, yac acoltayon ta awa'el-c'ab.

⁸Te Jehová ya me sc'ohtes ta pasel ta jtojol te bin ya sc'an yo'tan. Te sc'uxul awo'tan, Jehová, sbahtel q'uinal ay; ¡ma me xawihquitay te ya'tel ac'abe!