Read Tzeltal Salmos 139 Bible Online

Salmos 139 - Tzeltal bible

Salmos 139

¹Yu'un jach-c'ayoj. Ha salmo yu'un David. Jehová, awilbeyejon co'tan soc ana'beyejon jba.

²Ha'at ana'oj c'alal ya juhcan jba soc c'alal ya xhahchon; ana'oj ta namal te bintic jnopoj ta co'tan.

³Atsahtayej banti ya xbehenon soc banti ya jcux co'tan; ana'oj spisil te behetic cu'un;

⁴ma to xc'opojon a, ana'ojix spisil bin ya cal, Jehová.

⁵Yac ajoytayon ta nahil soc ta jpat, yac awac' ac'ab ta jtojol.

⁶Te bintic ana'oj, ¡c'ax bayel yutsil ya ca'iy, c'ax toyol, ma xhu' cu'un sna'el!

⁷¿Banti ya xhu' ya xnamijon ta stojol te Espíritu awu'une? ¿Banti ya xhu' ya xloc'on ta ahnel ta atojol?

⁸Teme ya xmohon ta ch'ulchan, tey ayat a; teme ya jchahpan jwayib ta yawil mach'atic chamenic, tey ayat a.

⁹Teme ya xhahchon ta wihlel ta xic' yu'un te sacubel q'uinal soc ya xnahinon ta sjehchelul mar,

¹⁰tey to me ya stojobteson bahel a te ac'abe, soc ya stsacon te awa'el-c'ab.

¹¹Teme hich ya cal: Ya me smucon te yihc'al q'uinal, soc ya xc'atp'uj ta ahc'abal te sacal q'uinal sjoytayejon, teme xchihone,

¹²te yihc'al q'uinal, ma ahc'abaluc ta atojol, te ahc'abal ha sacal q'uinal hich te bin ut'il te c'ahc'alel, ¡como te yihc'al q'uinal soc te sacal q'uinal pajal ayic ta atojol!

¹³Ha'at la apasbon te yutil te jbaq'uetal; la achahpanon ta sch'uht jnan.

¹⁴Ya calbat yutsil ac'oblal como c'ax bayel yutsil pasbilon; c'ax t'ujbil te awa'tel, sna'oj ta lec te jch'uhlele.

¹⁵Ma ba mucul ta asit te jbaq'uetal te c'alal muquen la jquich' pasel, te c'alal jalbilon ta sc'ubulil te lumq'uinal.

¹⁶La yil asit te hahch ta chicnajel te jbaq'uetal, ts'ihbabil ta libro awu'un spisil te c'ahc'aletic cu'un, te c'alal ma to ayuc ni junuc a.

¹⁷¡C'ax bayel yutsil ya ca'iy te bin anopoj, Dios cu'un! ¡C'ax bayel ta spisil!

¹⁸Te yacuc cahtay, c'ax hich ya xloc' a te bin ut'il hi'. C'alal ya xwihc' jsit, tey joquinejat to a.

¹⁹Dios cu'un, te yacuc alajin te mach'a chopole. ¡Loc'anic ta jtojol, ha'ex jmilawex!

²⁰Ya sbohlc'optayat, ya stojoltabe ta halel abihil te acontrataque.

²¹¿Ma bal yacuc jp'aj te mach'atic ya sp'ajat, Jehová, soc ya quihlintay te acontratac?

²²Jc'axel ya jp'aj; ha jcontratac ya ca'iy.

²³Na'bon co'tan, tsahtayawon, Dios cu'un; tsajawon soc na'bon bintic jnopoj ta co'tan.

²⁴Ila awil teme yacon ta bahel ta sbehlal bin chopol, tojobtesawon bahel ta be scuenta sbahtel q'uinal.