Read Tzeltal Salmos 140 Bible Online

Salmos 140 - Tzeltal bible

Salmos 140

¹Yu'un jach-c'ayoj. Ha salmo yu'un David. Ac'awon ta libre, Jehová, ta stojol te mach'a chopol; canantayawon ta stojol te j'uts'inwanejetic

²te ya snopic bin chopol ya spasic soc jujun c'ahc'al ya shachic c'op.

³Te yaq'uic jay ta huxel hich te bin ut'il ye chan; ay svenenohil ti'awal chan ta sti'il yehic. Selah

⁴Canantayawon, Jehová, te ma x'ochon ta sc'ab te mach'a chopol; canantayawon ta stojol te j'uts'inwanejetic te schapojic te ya syahltesonique.

⁵Te mach'atic stoyoj sbahic snac'ojbonic jyacol; slimojic ta ti' be te yaquil, la schahpaniquix lazohetic banti ya xc'axon. Selah

⁶Hich calbeyej te Jehová: Ha'at Diosat cu'un, xchihon. A'iybon jc'op, Jehová, te yacon ta yalel wocol ta atojol.

⁷Cajwal Jehová, jcoltaywanejat cu'un te ay awu'el, la amacbon jol ta yorahil guerra.

⁸Jehová, ma me xawa'be te bin ya sc'an yo'tan te mach'a chopol; ma me xawac' te lec ya xc'oht te bintic snopoj, scuenta yu'un ma ba ya stoy sba a. Selah

⁹Te mach'atic sjoytayejonic ac'a c'ohtuc ta sjolic te bintic chopol yalojique.

¹⁰Ac'a yahluc ta stojolic ac'aletic te ayic sc'ahc'al; ac'a yich'ic ch'ojel ochel ta c'ahc', ta xahab ta banti ma xhu' ya xloq'uic talel.

¹¹Ma me xhalaj ta q'uinal te mach'a chopol ya xc'opoj; ac'a yich' nutsel yu'un te bin chopol te mach'a ya x'uts'inwan.

¹²Jna'oj te Jehová stojil ya schahpan te pobre soc ya scoltay te mach'a mayuc bin ay yu'un.

¹³Te mach'atic toj yo'tanic ya me yalbat yutsil sc'oblal abihil; ¡te mach'atic toj yo'tanic, ya me xnahinic ta atojol!