Read Tzeltal Salmos 144 Bible Online

Salmos 144 - Tzeltal bible

Salmos 144

¹Ha salmo yu'un David. ¡Bayel me yutsil te Jehová, te muc'ul ton cu'un, te ya snohptesbon jc'ab ta yaq'uel guerra, te ya snohptesbon yalatac jc'ab ta tsaltamba!

²Ha jc'uxultaywanej soc toyol ts'ahc cu'un, ha ahnibal soc j'ac'aw ta libre cu'un, ha mahquilal cu'un te smuc'ulinej co'tan, ha te ya ya'bon ta ye'tal coc te pueblohetique.

³Jehová, ¿bin a te ants-winic yu'un yac awich' ta cuenta, o te yal-snich'an ants-winic yu'un te ay sc'oblal ta awo'tane?

⁴Te ants-winic hich ay te bin ut'il jahc' ta o'tanil; te c'ahc'aletic yu'un hich ay te bin ut'il axinal te c'axel ay.

⁵Jehová, jama te ch'ulchan, cohan tal; tija te witsiltic scuenta yu'un ya xloc' sch'ahilel.

⁶Tihltesa tsantsehwaletic, puca bahel te acontratac; t'ima bahel ya'tejibalul at'ihmalte', ac'a loc'uquic ta ahnel.

⁷Hacha tal ac'ab c'alal ta toyol, loq'uesawon ta bayel ha'etic, ta sc'ab te jyanlumetic

⁸te ya yalic lot, te ya swa'el-c'abinic lot.

⁹Dios cu'un, ya jc'ayojtaybat yach'il c'ayoj; ya jc'ayojtaybat ta arpa te ay lajun p'ij sc'ab,

¹⁰ha'at te yac awac' te ya ya'iyic tsalaw ajwaliletic; ha'at te yac awac' ta libre te David te a'bat awu'un ta stojol lajinwanej espada.

¹¹Coltayawon, ac'awon ta libre ta sc'ab te jyanlumeticte ya yalic lot, te ya swa'el-c'abinic lot.

¹²Te jquerem-nich'nabtic ta squeremilic hich ac'a coluc te bin ut'il ts'umbil nichimetic; te cantsil-nich'nabtic hich ac'a c'ohtuc te bin ut'il ch'albil oyetic ta sna ajwalil;

¹³te snahul jwe'eltic nojeluc ta spisil ta chahp we'eliletic; te tuminchijetic cu'untic ac'a p'ohluc bayel ta mil, bayel ta mil ta mil ta aquiltic cu'untic;

¹⁴te j'a'tel-wacaxetic cu'untic ayuc yipic ta a'tel. Ma me ayuc banti jamal te ts'ahc, mayuc banti ya xloq'uic bahel ta chuquel, ma me ayuc aw yu'un xiwel ta callehetic cu'untic.

¹⁵¡Bayel me yutsil te pueblo te ay yu'un spisil ini! ¡Bayel me yutsil te pueblo te ha Dios yu'un te Jehová!