Read Tzeltal Salmos 145 Bible Online

Salmos 145 - Tzeltal bible

Salmos 145

¹Ha salmo yu'un halbeyel yutsil sc'oblal; yu'un David. Ya jtoybat ac'oblal, Dios cu'un, Ajwalil cu'un, ya calbe yutsil sc'oblal abihil ta spisil ora soc sbahtel q'uinal.

²Jujun c'ahc'al ya calbat yutsil ac'oblal soc ya calbe yutsil sc'oblal abihil spisil ora soc sbahtel q'uinal.

³Muc' te Jehová, ya sc'an ya yich' halbeyel yutsil sc'oblal; mayuc mach'a ya xhu' yu'un sna'el te smuc'ule.

⁴Ta cajalcaj ts'umbalil ya me yalbeyic yutsil sc'oblal awa'tel, ya me spuquic ta halel te bintic apasoj ta awu'el.

⁵Ya me jna'ulan te t'ujbil yutsilal te smuc'ul awutsilal soc te yutsil awa'tele.

⁶Te ants-winiquetic ya me yalbeyic sc'oblal awa'tel te c'ax yan a, te ho'on ya me jpuc ta halel te amuc'ule.

⁷Ya me spuquic ta halel te smuc'ul yutsil awo'tan, soc ya me sc'ayojtaybat te stojil awa'tele.

⁸Te Jehová t'ujbil yo'tan soc ya sna' yo'bolil jbahtic, ma x'ilin ta ora soc ay bayel sc'uxul yo'tan.

⁹Te Jehová lec bin ya spas ta stojol spisil, soc ya sc'uxultay spisil te bintic spasoje.

¹⁰¡Ya me yalbat yutsil ac'oblal, Jehová, spisil te bintic apasoj; soc ya me yalbat yutsil ac'oblal te mach'atic awu'un te ch'ultesbilique!

¹¹Ya me yalbeyic sc'oblal te yutsilal te cuentahinel awu'un, soc ya me yalbeyic sc'oblal awu'el,

¹²scuenta yu'un ya ya'be sna'ic spisil ants-winiquetic te bintic apasoj ta awu'el soc te smuc'ul yutsilal te cuentahinel awu'une.

¹³Te cuentahinel awu'un ha cuentahinel scuenta sbahtel q'uinal, soc te awa'tel ta ajwalil ay ta spisil ta cajalcaj ts'umbaliletic.

¹⁴Te Jehová ya shach spisil te mach'atic ya xyahlic, ya snit hahchel spisil te mach'atic nijajtic.

¹⁵Spisilic q'uelel sitic ta atojol, ha'at yac awa'be swe'elic ta yorahil.

¹⁶Yac ajam ac'ab, yac awac' nojuc sch'uhtic spisil bintic cuxajtic.

¹⁷Te Jehová toj spisil bintic ya spas soc ya sc'uxultay spisil bintic spasoj.

¹⁸Nopol ay te Jehová ta stojol spisil mach'atic ya sc'oponic, spisil mach'atic ya sc'oponic ta smelelil.

¹⁹Ya ya'be te bintic ya sc'an yo'tanic te mach'atic ya yich'ic ta muc'; ya ya'iybe yawic soc ya scoltaylan.

²⁰Te Jehová ya scanantay spisil te mach'atic c'ux ya x'a'iyot yu'unic, pero ya sjinticlan spisil te mach'atic chopolique.

²¹Ya me calbe yutsil sc'oblal te Jehová. ¡Spisilic ac'a yalbeyic yutsil sc'oblal te sch'ul sbihil ta spisil ora soc ta sbahtel q'uinal!