Read Tzeltal Salmos 147 Bible Online

Salmos 147 - Tzeltal bible

Salmos 147

¹¡Halbeya yutsil sc'oblal te Jehová! como lec ta c'ayojtaybeyel c'ayojetic te Dios cu'untic, coomo t'ujbil soc hich ya sc'an te ya yich' halbeyel yutsil sc'oblal.

²Te Jehová ya scha'pas te Jerusalén, ya stsob tal te mach'atic yu'un Israel te puhquemique.

³Ha ya slecubtes te mach'a pich'il yo'tan, soc ya spotsbe yehchen.

⁴Ha ya yal te jayeb eq'uetic ay, ta jujun ya yic'ticlan ta sbihil.

⁵Muc' te Cajwaltic soc bayel yu'el; mayuc ta p'isel te snopojibal yu'une.

⁶Te Jehová ya stoy te mach'atic peq'uelic yan te mach'atic chopolic ya spehc'an c'alal lum.

⁷Halbeya wocol ta c'ayoj te Jehová; c'ayojtayahic soc arpa te Dios cu'untique.

⁸Ha ya smac ta tocal te ch'ulchan, ya yac' tal ha'al ta bahlumilal, ya yac' coluc aquiltic ta witsiltic.

⁹Ya ya'be swe'el te chambahlametic, soc te yalatac jojetic te c'alal ya x'awonic.

¹⁰Ma ha'uc ay ta mulanel yu'un te yip te cawu, o te bin ya xhu' yu'un spasel te winique;

¹¹te Jehová ya smulan te mach'atic ya x'ich'ot ta muc' yu'unic, te mach'atic smuc'ulinej yo'tanic te sc'uxul yo'tane.

¹²¡Jerusalén, halbeya yutsil sc'oblal te Jehová; halbeya yutsil sc'oblal te Dios awu'un, Sión!

¹³como ya ya'be yip te sc'atal te'el te ochibaletic awu'unic, soc ya ya'be bendición te anich'nabic te ay ta awohlil.

¹⁴Ha ya yac' lahmajuc q'uinal ta spahmal alumal, ya yac' nojuc ach'uht ta lequil trigo.

¹⁵Ha ya sticon tal ta bahlumilal te sc'op, ora ya xbehen te sc'ope.

¹⁶Hich ya yac' tal me'sic te bin ut'il stsotsel tuminchij, soc ya spuc bahel me'sic hich te bin ut'il tan.

¹⁷Ya yac' cohuc tal bat hich te bin ut'il bic'tal tonetic; ¿mach'a ya xcuhch yu'un te siquile?

¹⁸Ya sticon tal sc'op, hich ya x'uhl; ya yac' behenuc te ic' yu'un, hich ya x'oquin te ha'etique.

¹⁹La ya'be sna' Jacob te sc'op, la ya'be sna' Israel te mandariletic yu'un soc te bintic schapoj ta yo'tan.

²⁰Mayuc hich spasbeyej te yantic nacionetic, ma sna'ic te bintic schapoj ta yo'tane. ¡Aleluya!