Read Tzeltal Salmos 148 Bible Online

Salmos 148 - Tzeltal bible

Salmos 148

¹¡Aleluya! Halbeyahic yutsil sc'oblal Jehová c'alal ta ch'ulchan, halbeyahic yutsil sc'oblal c'alal ta toyol.

²Halbeyahic yutsil sc'oblal Jehová apisilic ch'ul a'batex yu'un, halbeyahic yutsil sc'oblal Jehová apisilic te ayex ta ch'ulchan.

³Halbeyahic yutsil sc'oblal, ha'ex c'ahc'al soc u; halbeyahic yutsil sc'oblal, ha'ex eq'uetic te ay ats'anabulic.

⁴Halbeya yutsil sc'oblal Jehová, ha'at ch'ulchan te mero toyol ayat, soc te ha'etic te ayic ta sba te ch'ulchane.

⁵Ac'a yalbeyahic yutsil sc'oblal te sbihil te Jehová, como ha la yal mandar, hich pastajic.

⁶Ha la yac'ticlan ta yawilic scuenta sbahtel q'uinal; la yac'ticlambe mandar te ma ba ya yich' c'axuntayel.

⁷Halbeyahic yutsil sc'oblal Jehová c'alal ta bahlumilal, muc'ul chambahlametic ta mar soc spisil sc'ubulil te mar,

⁸te tsantsehwal soc te bat, te me'sic soc te tocal, te tulan ic' te ya spas te bin ya xhalbot yu'une;

⁹te witsiltic soc te tsehletic, te te'etic te ya yac' sit soc spisil te cedrohetic;

¹⁰te ha'mal chambahlametic soc te alaq'uil chambahlametic, te chanetic soc te mutetic te ya xwihlique;

¹¹te ajwaliletic ta bahlumilal soc spisil te pueblohetic, te príncipaletic soc jcuentahinwanejetic ta bahlumilal,

¹²queremetic soc ach'ixetic, mamaletic soc alaletic.

¹³Halbeyahic yutsil sc'oblal te sbihil te Jehová, como ha nax stuquel te ay ta tohytesbeyel sc'oblal. Toyol ay yu'un ch'ulchan soc yu'un bahlumilal te yutsilale.

¹⁴Ha stoybeyej yip te pueblo yu'une; ¡halbeyahic yutsil sc'oblal spisil mach'atic yu'un te ch'uhltesbilic, ha te snich'nab Israel, te pueblo te nopol ay ta stojol! ¡Aleluya!