Read Tzeltal Salmos 17 Bible Online

Salmos 17 - Tzeltal bible

Salmos 17

¹A'iya awa'iy, Jehová, te bin stojil ya jc'ambat, a'iybon awa'iy caw. A'iybon awa'iy jc'op ta atojol te ma scuentahuc lo'loywanej.

²Ac'a taluc ta atojol te chahpanel cu'un; ac'a yil asit te bin toj ay.

³Ha'at la atsahtaybon co'tan, tal awilon ta ahc'abal; la atsajon, mayuc bin chopol la atahbon. La jnop ta co'tan te ma ba ya sta smul te que.

⁴Te ya'tel ants-winiquetic, ta scuenta ac'op jcanantayej jba te ma ba ya jt'umbe sbe te j'uts'inwanejetique.

⁵Behenemon ta behetic awu'un, mayuc banti bilts'uj te coque.

⁶Ya jc'oponat, Dios cu'un, yu'un yac awa'iybon jc'op, ts'ehana achiquin ta jtojol, a'iybon awa'iy te jc'ope.

⁷Ac'a ta ilel te bayel yutsil sc'uxul awo'tan, ha'at te yac acoltay te mach'atic ya snac' sbahic ta awa'el-c'ab ta stojol te mach'atic ya scontrahinique.

⁸Canantayawon hich te bin ut'il sch'uhlel asit; nac'awon ta ye'tal yaxinal axic',

⁹ta stojol te mach'atic chopol yo'tanic te ya yuts'inonic, ta stojol te jcontratac te sjoytayejonic te ya sc'an ya yac'onic ta lajele.

¹⁰Macbil yo'tanic yu'un sjuhp'elic, ya xloc' toyba-c'op ta yehic.

¹¹Nohpojemic tal ta banti yacotic ta behel, t'ojol sit yilbelotic yu'un ya sjipotic ta lum.

¹²Hich ayic te bin ut'il choj te ya sc'an ya stsac swe'el, hich te bin ut'il jcolel choj te ya spahcan sba ta stsaquel swe'el.

¹³Hahchan, Jehová, loc'an tal ta stahel, lajinlana; ta scuenta te espada awu'un coltaybon jcuxlejal ta sc'ab te mach'atic chopol yo'tanic;

¹⁴ta scuenta ac'ab, Jehová, ac'awon ta libre ta sc'abic, ha te winiquetic scuenta bahlumilal te ha nax yu'unic te bintic ay ta cuxlejal ini, te nojel sch'uhtic ta bintic ay awu'une. Bayel bintic ay yu'un te snich'nabic, soc ya to spas sobra yu'un te smamataque.

¹⁵Yan te ho'one, ta scuenta stojil bin ay ta pasel ya quilbat asit; c'alal ya xwihc' jsit, tic' ya ca'iy a te ya quil bin awilel. Yu'un jach-c'ayoj. Ha salmo yu'un David, ya'bat Jehová. La yalbe te Jehová te c'ayoj ini te bin c'ahc'alil ac'ot ta libre yu'un ta sc'ab spisil te scontratac soc ta sc'ab Saúl. Hich la yal: