Read Tzeltal Salmos 24 Bible Online

Salmos 24 - Tzeltal bible

Salmos 24

¹Salmo yu'un David. Ha yu'un Jehová te q'uinal soc spisil bintic ay tey a, te bahlumilal soc spisil mach'atic nahinemic tey a;

²como ha la ya'be yich'o-ip ta sba te maretic, la scajan ta sba muc'ul-ha'etic.

³¿Mach'a ya xhu' ya xmo bahel ta wits yu'un Jehová? ¿Mach'a ya xhu' ya stehc'an sba ta ch'ul awilal yu'un?

⁴Ha te mach'a pocbil sc'ab soc sac te yo'tane; ha te mach'a ma ba sch'uhunej lotil diosetic soc te mayuc bin yaloj ta jamal ta lot.

⁵Ha ya yich' bendición yu'un Jehová soc stojil chahpanel yu'un Dios te Jcoltaywanej yu'une.

⁶Hich ay te jcaj ts'umbalil te ya slehic te Jehová, ha te mach'atic ya slehbat asit awelaw, Diosat yu'un Jacob. Selah

⁷¡Hacha ajolic, puertahetic! ¡Hacha ajolic, antiguo puertahetic, yu'un ya x'och te Ajwalil te ay yutsilal!

⁸¿Mach'a a te Ajwalil te ay yutsilal? Ha te Jehová te ay yip soc te ay yu'el, ha te Jehová te ay yip ta guerra.

⁹¡Hacha ajolic, puertahetic! ¡Hacha ajolic, antiguo puertahetic, yu'un ya x'och te Ajwalil te ay yutsilal!

¹⁰¿Mach'a a te Ajwalil te ay yutsilal? ¡Ha te Jehová te scuentahinej spisil, ha me te Ajwalil te ay yutsilale! Selah