Read Tzeltal Salmos 25 Bible Online

Salmos 25 - Tzeltal bible

Salmos 25

¹Salmo yu'un David. Ya jtoy mohel jch'uhlel ta atojol, Jehová;

²Dios cu'un, ha'at smuc'ulinejat co'tan; ma xawac'on ta q'uexlal, ¡Ma me stse'layonic te jcontrataque!

³Melel mayuc mach'a te smuc'ulinejat yo'tan te ya xq'uexawan; ha ya stahic q'uexlal te mach'atic tojol nax ya stoy sbahique.

⁴A'bon quil te behetic awu'un, Jehová; a'bon jna' te behetic awu'une.

⁵Tojobtesawon bahel ta scuenta te smelelil c'op awu'un, soc nohptesawon, como ha'at Diosat yu'un te jcolele, ha'at smuc'ulinejat co'tan sjunal c'ahc'al.

⁶Na'a me, Jehová, te t'ujbil yutsil awo'tan soc te sc'uxul awo'tan te sbahtel q'uinal ayic.

⁷Ma me xana'bonix te muliletic cu'un c'alal queremon to a, soc te toybahil cu'une. Hich te bin ut'il ay sc'uxul awo'tan, na'awon, Jehová, ta scuenta yutsil awo'tan.

⁸Lec soc toj yo'tan te Jehová; ha yu'un ya ya'be sna' te jmulawiletic te be yu'une.

⁹Ya stojobtes ta spasel te bin toj te mach'atic peq'uel yo'tanic, ya ya'be snop te be yu'un te mach'atic manso yo'tanique.

¹⁰Spisil te behetic yu'un Jehová ha sc'uxul-o'tanil soc smelelil yu'un te mach'atic ya scanantaybeyic te chapbil-c'op soc te testigo-c'opetic yu'une.

¹¹Ta scuenta yich'el ta muc' te abihil, Jehová, pasbon perdón, yu'un muc' te jmule.

¹²¿Mach'a a te winic te ya yich' ta muc' te Jehová? Ha ya x'a'bot sna' yu'un te be te ya sc'an ya stsahe.

¹³Ya me ya'iybe yutsil te bintic lec, soc te sts'umbal ya me yich' hilel te q'uinale.

¹⁴Te Jehová jun yo'tan soc te mach'atic ya yich'ic ta muc', ya ya'be sna' te chapbil-c'op yu'une.

¹⁵Spisil ora ya cac' jsit ta stojol Jehová, como ha ya sloq'uesbon coc ta yaquil.

¹⁶Ilawon soc c'uxultayawon, como jtuquel ayon soc ayon ta wocol.

¹⁷P'ohlemix te jwocol ta co'tan; loq'uesawon a ta mel-o'tan cu'un.

¹⁸Ilbon awil te uts'inel soc te wocol cu'une, soc pasbon perdón yu'un spisil jmul.

¹⁹Ilawil bin ut'il p'ohlemiquix te jcontratac soc te ta slab yo'tanic ya sp'ajonic.

²⁰¡Canantaybon te jcuxlejal soc ac'awon ta libre! Ma xawac'on ta q'uexlal, como smuc'ulinejat te co'tane.

²¹Te jun o'tanil soc toj o'tanil ac'a scanantayon, como ha'at smuc'ulinejat co'tan.

²²¡Dios cu'un, ac'a ta libre te Israel yu'un spisil te swocole!