Read Tzeltal Salmos 27 Bible Online

Salmos 27 - Tzeltal bible

Salmos 27

¹Salmo yu'un David. Ha sacal q'uinal cu'un soc ha jcolel te Jehová, ¿mach'a ya jxi'? Te Jehová ha ahnibal yu'un te jcuxlejal, ¿mach'a a te ya ya'bon xiwel?

²Te c'alal hahch scontrahinon te mach'atic chopol yo'tanic, te mach'atic ya ya'bonic jwocol soc te jcontratac, yu'un ya slajimbonic jbaq'uetal, la sc'ohchin yoquic soc yahlic.

³Aunque bayel soldadohetic ya sjoytayonic, ma ba ya xiw co'tan; aunque ya ya'bonic guerra, ay me smuc'ul co'tan.

⁴Junax te bin jc'ambeyej te Jehová, te ha ya jle: ha te ya x'ayinon ta sna Jehová te jayeb c'ahc'al cuxulon, yu'un ya quilbe st'ujbilal te Jehová soc yu'un ya jle ta Templo yu'un.

⁵Ya me snac'on ta Nahilpac' Templo yu'un ta yorahil wocol; ya me yac'on ta mero yutil te sna; toyol me ya yac'on ta sba muc'ul ton.

⁶Hich toyol ya xc'ohon ta stojol te jcontratac te ya sjoytayonique; soc ta Nahilpac' Templo yu'un ya cac' milbil mahtaniletic ta scuenta awonel yu'un yutsil co'tan; ya jc'ayojtay c'ayojetic ta stojol Jehová.

⁷¡A'iybon jc'op, Jehová, c'alal ya x'awonon! ¡C'uxultayawon soc jac'bon jc'op!

⁸Hich la yalbon ac'oblal te co'tan: Leha te sit yelaw, xchi. Ya jlehbat asit awelaw, Jehová.

⁹¡Ma me xanac' asit awelaw ta jtojol! ¡Ma me socuc awilimba yac ach'ay ta awo'tan te a'bat awu'un, ha'at jcoltaywanejat cu'un! Ma me xawihquitayon soc ma me xapihteson hilel, ha'at Diosat yu'un te jcolele.

¹⁰Aunque ya spihteson te jtat soc te jnan, ha ya yic'on te Jehová.

¹¹A'bon quil te be awu'un, Jehová, soc ic'awon bahel ta stojil be ta scaj te jcontrataque.

¹²Ma xawac'on a te bin ya sc'an yo'tanic te jcontratac, yu'un hahchemic lotil testigohetic ta jcontra, ya sjac' yo'tanic ta uts'inwanej.

¹³Ch'ayix co'tan te manchuc la jch'uhun te ya me quilbe yutsil yo'tan te Jehová li' ta cuxlejal ini.

¹⁴¡Mahliya te Jehová! ¡Ac'a fuerza, ayuc me yip awo'tan! ¡Hich, mahliya te Jehová!