Read Tzeltal Salmos 31 Bible Online

Salmos 31 - Tzeltal bible

Salmos 31

¹Yu'un jach-c'ayoj. Salmo yu'un David. Ha'at smuc'ulinejat co'tan, Jehová; ma me ayuc bin ora ya jta q'uexlal. ¡Ac'awon ta libre ta scuenta stojil awo'tan!

²Ts'ehana achiquin ta jtojol, ac'awon ta libre ta ora. ¡Ha'uc me toyol ch'entiquilat cu'un soc ahnibalat banti ya xcolon!

³Ha'at toyol ch'entiquilat soc ahnibalat cu'un; ta scuenta yich'el ta muc' abihil tojobtesawon soc joquinawon ta behel.

⁴Loq'uesawon a te ta yaquil te snac'ojic ta jtojol, como ha'at te banti ya jnac' jbahe.

⁵Ya ca'bat ta ac'ab te jch'uhlele; la awac'on ta libre, Jehová, Diosat te stalel jun awo'tan ta jtojol.

⁶Ya quihlay te mach'atic ha smuc'ulinej yo'tanic te loc'ombahetic te mayuc scuentahil; yan te ho'one, ha smuc'ulinej co'tan te Jehová.

⁷Tse'el co'tan soc ay yutsil co'tan yu'un te sc'uxul awo'tane, como la awilbon jwocol soc la ana'bon swocol te jch'uhlele.

⁸Ma ba la awac'on ta sc'ab te jcontra; la awac' tehc'ajucon ta buen jamal q'uinal.

⁹C'uxultayawon, Jehová, yu'un ayon ta wocol; yac ta lajel jsit yu'un mel-o'tan, soc ha nix hich te jch'uhlel soc te jbaq'uetale.

¹⁰Yac ta lajel jcuxlejal yu'un sc'uxul, soc te ha'biletic cu'un yac ta lajel yu'un ahcan; ya xlaj quip ta scaj jmul, soc yaquix ta lajel te jbaquele.

¹¹Tse'laybilon yu'un spisil te jcontratac, c'ax to xan hich a yu'un te jpat-xuhque; xi'bilon yu'un te mach'atic ya sna'bon jba. ¡Ya x'ahnic bahel ta jtojol te mach'atic ya yilonic ta calle!

¹²Ch'ayemon ta yo'tanic hich te bin ut'il mach'a chamen; hich c'ohemon te bin ut'il wuyem oxom.

¹³Ya ca'iybe te swulwulc'opic tsobolic; ya sjoytayon xiwel, ya schap sc'opic yu'un scontrahimbelonic, soc ya snopic te ya smilonique.

¹⁴Pero ha'at smuc'ulat co'tan, Jehová; hich ya cal: ¡Ha'at Diosat cu'un,

¹⁵ay ta ac'ab te corahil, xchihon! ¡Ac'awon ta libre yu'un te jcontratac soc te mach'atic ya snutsonique!

¹⁶Ac'a tihluc sts'anabul awelaw ta stojol te a'bat awu'une; ¡coltayawon ta scuenta sc'uxul awo'tan!

¹⁷Ma me jta q'uexlal, Jehová, como la jcawtayat; ac'a sta q'uexlal te mach'atic chopolic, soc uma'ubuc ta muquenal.

¹⁸Ac'a ch'abuc ta c'op te lotil-ehaletic, te ta scuenta toybahil soc p'ajel ya scontrac'optayic te mach'a toj yo'tane.

¹⁹Mero muc' te yutsil awo'tan, te ha q'uejbil awu'un yu'un te mach'atic ya yich'at ta muc', te ha la awa'be yilic ta stojol te ants-winiquetic te mach'atic smuc'ulinejat yo'tanique.

²⁰Ta banti muquen ay ta atojol tey yac anac'ticlan a ta stojol te bin chopol schahpanej te winiquetique; yac anac'ticlan ta Anahilpac' ta stojol te chopol c'opetique.

²¹Bayel me yutsil te Jehová, yu'un la ya'bon quil te yutsil sc'uxul yo'tan te bin ora ayon ta wocol.

²²Hich la jcal te c'alal ayon ta xiwel a: Loq'uesbilon ta atojol, xchihon; pero la awa'iybon te bin la jc'ambat te c'alal la jcawtayate.

²³C'ux me xawa'iy ta awo'tanic te Jehová apisilic te ch'ultesbilex yu'une. Te Jehová ya scanantay te mach'atic jun yo'tanic ta stojol, pero ts'acal ya ya'be castigo te mach'atic jtoybahetique.

²⁴Pasahic tulan, ayuc me yip awo'tanic apisilic te smuc'ulinej awo'tanic te Jehová.