Read Tzeltal Salmos 33 Bible Online

Salmos 33 - Tzeltal bible

Salmos 33

¹Tse'eluc me awo'tanic ta stojol Jehová, ha'ex te toj awo'tanique; ha t'ujbil te ya yalbeyic yutsil sc'oblal te mach'atic lec yo'tanique.

²Halbeyahic yutsil Jehová ta arpa, c'ayojtaybeyahic c'ayojetic soc lira te ay lajuneb sc'ab.

³C'ayojtaybeyahic yach'il c'ayoj, ¡tijahic ta lec, soc awonanic yu'un yutsil q'uinal!

⁴Como ha toj te sc'op Jehová, soc spisil bintic ya spas, ha ya spas ta scuenta te stalel jun yo'tan.

⁵C'ux ta yo'tan te bin toj ta pasel soc te toj chahpanele; nojel ta bahlumilal te sc'uxul yo'tan Jehová.

⁶Ta scuenta te sc'op te Jehová la yich' pasel te ch'ulchan, spisil te bintic ay tey a pasbilic ta yic'al ye.

⁷Ya sbusan[10] ta jtsohb nax te ya'lel mar; ya yac' ta sq'uejojibal te sc'ubulile.

⁸¡Ac'a yich'ic ta muc' Jehová spisil mach'atic ayic ta q'uinal! ¡Ac'a xiwuquic spisil mach'atic nahinemic ta bahlumilal!

⁹como ha c'opoj, hich pastaj; la yal mandar, hich chicnaj.

¹⁰Te Jehová ya slajimbe sc'oblal te bin schapojic te nacionetic, ya sjimbe te bin snopojic te pueblohetique.

¹¹Te bintic schapoj te Jehová stalel ay sbahtel q'uinal; te bintic snopoj ta yo'tan stalel ayic ta cajalcaj ts'umbalil.

¹²Bayel me yutsil te nación te ha Dios yu'un te Jehová, ha te pueblo te la stsa te ha yu'un ya xc'oht.

¹³Te Jehová ya yil c'alal ta ch'ulchan, ya yil spisil te ants-winiquetic;

¹⁴ya yil c'alal ta banti nahinem spisil te mach'atic nahinemic ta q'uinal.

¹⁵Ha la spasbe yo'tanic spisilic, soc ya yilbe spisil te ya'telique.

¹⁶Te ajwalil ma ba ya xcoltayot ta scuenta bayel soldadohetic yu'un, soc te mach'a ma xiw ma xhu' ya xloc' ta ahnel ta scuenta bayel yip.

¹⁷Te cawu ma xhu' ya xcoltaywan; aunque bayel yip, ma xhu' ya x'ac'awan ta libre.

¹⁸Te sit te Jehová ay ta stojol te mach'atic ya yich'ic ya muc', te mach'atic ha smuc'ulinej yo'tanic te sc'uxul yo'tan,

¹⁹yu'un ya scoltay ta lajel soc yu'un ya ya'be bin ya xcuxajic a ta yorahil wi'nal.

²⁰Smuc'ulinej co'tantic te Jehová, ha jcoltaywanej soc ha mahquilal cu'untic.

²¹Ha yu'un tse'el co'tantic ta stojol, como ha smuc'ulinej co'tantic te sch'ul sbihile.

²²¡Hich ac'a c'ohtuc ta jtojolcotic te sc'uxul awo'tan, Jehová, te bin ut'il ya cac' smuc'ulin co'tantic te ha'ate!