Read Tzeltal Salmos 34 Bible Online

Salmos 34 - Tzeltal bible

Salmos 34

¹Salmo yu'un David te c'alal la syanijtes sit yelaw ta stojol Abimelec, soc tenot loq'uel yu'un, hich loc' bahel. Ya calbe yutsil sc'oblal Jehová ta spisil ora; spisil ora ay ta que sc'ayojtaybeyel yutsilal.

²Ay yutsil q'uinal ya ca'iy yu'un te Jehová; ya me ya'iyic te mach'atic peq'uel ayic soc tse'el me yo'tanic yu'un.

³Joquinawon ta stohytesbeyel yutsil sc'oblal te Jehová, pajaluc me ya jtohytesbetic sc'oblal te sbihile.

⁴La jle te Jehová, la ya'iybon jc'op, la yac'on ta libre yu'un spisil te jxiwele.

⁵Te mach'atic ya yac' sitic ta stojol Jehová chican te bayel yutsil yo'tanic, mayuc bin ora ya x'ac'otic ta q'uexlal.

⁶C'opoj te pobre winic ini, ha la ya'iy te Jehová soc la yac' ta libre yu'un spisil te swocole.

⁷Te ch'ul a'bat yu'un Jehová ay ta sjoyobal te mach'atic ya yich'ic ta muc', soc ha ya scoltay.

⁸Pasahic prueba, ilawilic te ha lec yo'tan te Jehová. ¡Bayel yutsil te mach'a ya smuc'ulin yo'tan!

⁹Ich'ahic ta muc' te Jehová, ha'ex te ch'ultesbilex yu'une, mayuc bin ya xpasot falta yu'un te mach'atic ya yich'ic ta muc'.

¹⁰Te jcolel chojetic ya xlaj yipic soc ya xtal swi'nalic, yan te mach'atic ya slehic te Jehová mayuc bin ya xpasbot falta yu'un te bin leque.

¹¹La'ic, cal-jnich'nab, a'iybon awa'iyic jc'op; ya ca'beyex anopic yich'el ta muc' te Jehová.

¹²¿Mach'a a te ya sc'an scuxlejal, te ya sc'an te bayel c'ahc'al ya yil te bin leque?

¹³Coma awe ta yalel bin chopol, soc te sti'il awe te ma ba ya yal lo'loywanej.

¹⁴Q'ueja aba ta stojol te bin chopol, pasa te bin lec; leha te lamal q'uinal soc t'uhuna.

¹⁵Te sit Jehová ay ta stojol te mach'atic toj yo'tanic, ts'ehel schiquin ta ya'iybeyel yawic.

¹⁶Te Jehová ya yilintay te mach'atic ya spasic te bin chopol, yu'un ya stup'be ta bahlumilal te sna'ojibal yu'unique.

¹⁷Ya x'awonic te mach'atic toj yo'tanic, ya x'a'iybotic yu'un Jehová soc ha ya yac' ta libre yu'un spisil te swocolique.

¹⁸Te Jehová nopol ay ta stojol te mach'atic ayic ta mel-o'tan, soc ya scoltay te mach'atic pich'il yo'tanique.

¹⁹Ay bayel swocolic te mach'a toj yo'tan, pero te Jehová ya scoltay loq'uel ta spisil.

²⁰Ha ya scanantaybe spisil te sbaquel; mayuc jch'ixuc te ya yich' waq'uele.

²¹Te mach'atic chopolic ya xmilotic yu'un te bin chopole, te mach'atic ya yihlayic te mach'a toj yo'tan, ya xhalbotic te ay smulique.

²²Pero te Jehová ya yac' ta libre te a'batetic yu'un; ma ba ya xhalbotic te ay smulic te mach'atic ha smuc'ulinej yo'tanique.