Read Tzeltal Salmos 37 Bible Online

Salmos 37 - Tzeltal bible

Salmos 37

¹Salmo yu'un David. Ma me x'ilinat yu'un te mach'atic chopol yo'tanic, ma me xti'tonuc awo'tan yu'un te mach'atic chopol ya'telique,

²como ora ya xtaquij hich te bin ut'il ac, hich te bin ut'il yaxal ha'mal ya me xtaquij.

³Ac'a smuc'ulin awo'tan te Jehová soc pasa te bin leque; hich ya x'ayinat ta q'uinal soc yac amulan te bin smelelile.

⁴Ac'a smulan awo'tan te Jehová, hich ya ya'bat te bintic ya sc'an te awo'tane.

⁵Ac'a ta stojol Jehová te be awu'un, ha ac'a smuc'ulin awo'tan, hich ya spas te bin ya sc'an pasele.

⁶Hich ya yac' chicnajuc te bin ut'il sacal q'uinal te bin stojil yac apas, soc te bin toj ta pasel ta atojol hich ya yac' chicnajuc te bin ut'il sts'anabul c'ahc'al ta ohlil c'ahc'al.

⁷Ch'aban me ta stojol Jehová soc junuc me awo'tan xamahliy. Ma me x'ilinat yu'un te mach'a ay bin lec ya xc'oht ta loq'uel yu'un, te mach'a ya spas te bin chopole.

⁸Ihquitaya te ilimba, hiluc awu'un te c'ahc'ubel; ma me x'ilinat, como ha ya yac' c'ohtuc te bin chopole.

⁹Como te mach'atic chopolic ya me yich'ic loq'uesel ta q'uinal, yan te mach'atic ha ya smuc'ulin yo'tanic te Jehová, ya me x'a'bot yich'ic hilel te q'uinale.

¹⁰Nopol ya xch'ay bahel te mach'at chopol; yac ale, pero ma ba tey ayix a.

¹¹Yan te mach'atic manso yo'tanic ya me yich'ic hilel te q'uinal soc ya me smulanic bayel lamal q'uinal.

¹²Te mach'a chopol yo'tan ya snop bin ut'il ya yuts'in te mach'a toj yo'tan, soc ya sc'ux ye ta stojol.

¹³Pero ya me stse'layot yu'un te Cajwaltic, como na'bil yu'un te nopol ya xlajix yorahil.

¹⁴Te mach'atic chopol yo'tanic ya sloq'ues te espada yu'unic soc ya snit st'ihmalte'ic yu'un ya slajinic te pobre soc te mach'a mayuc bin ay yu'un, scuenta yu'un ya smilic te mach'atic toj te stalelique.

¹⁵Ha nix ya yich'ic lowbeyel yo'tanic a te ta espada yu'unic, soc ya yich'ic wac'beyel st'ihmalte'ic.

¹⁶Ha lec xan a te jtebuc bin ay yu'un te mach'a toj yo'tan te bin ut'il te sc'ulejalic tsobol mach'atic chopol yo'tanic;

¹⁷como ya yich'ic wac'beyel sc'abic te mach'atic chopol yo'tanic, pero te Jehová ya scanantay te mach'atic toj yo'tanique.

¹⁸Te Jehová ya sna'be te c'ahc'aletic yu'un te mach'atic lec yo'tanic, soc te bin ya x'a'bot yich'ic hilel sbahtel q'uinal ay.

¹⁹Ma ba ya stahic q'uexlal ta yorahil wocol, soc ta yorahil wi'nal ya me xnoj sch'uhtic.

²⁰Yan te mach'atic chopol yo'tanic ya me xlajic; te scontratac te Jehová ya me yich'ic lajinel, hich te bin ut'il sjuhp'el tentsunetic, ya me xch'ayic bahel hich te bin ut'il ch'ahil.

²¹Te mach'a chopol yo'tan ay bin ya smajan, pero ma ba ya sut; yan te mach'a toj yo'tan ya xc'uxultaywan soc ay bin ya yac' stuquel.

²²Te mach'atic ya x'a'botic bendición yu'un Jehová, ya me yich'ic hilel te q'uinale, yan te mach'atic bohloben sc'oblalic yu'un, ya me xlajic stuquelic.

²³Te Jehová ya schahpambe jujujihm yoc te ants-winic, lec yo'tan yu'un te be yu'une;

²⁴te c'alal ya xyahl, ma ba tey ya xhil a, como ha tsacbil ta sc'ab yu'un te Jehová.

²⁵Queremon te namey, yo'tic mamalonix, pero mayuc quiloj te pihtesbil te mach'a toj yo'tan, soc mayuc quiloj te yac ta sc'anel pan te snich'nabe.

²⁶Spisil ora ya xc'uxultaywan soc ya yac' ta majanel, ha bendición ya xc'oht te snich'nabe.

²⁷Ihquitaya te bin chopol, pasa te bin lec, hich me ay banti ya xnahinat spisil ora a,

²⁸como te Jehová c'ux ta yo'tan te bin stojil ta pasel, soc ma ba ya spihtes te mach'atic jun yo'tanic ta stojol. Spisil ora ya yich'ic canantayel, yan te sts'umbal te mach'atic chopol yo'tanic ya yich'ic lajinel.

²⁹Te mach'atic toj yo'tanic ya me yich'ic hilel te q'uinale, sbahtel q'uinal ya xnahinic tey a.

³⁰Ya xloc' p'ijil c'op ta ye te mach'a toj yo'tan, soc ya yal te bin stojil.

³¹Ay ta yo'tan te Ley yu'un te Dios yu'une; ha yu'un ma ba ya xbilts'uj te yoque.

³²Te mach'a chopol yo'tan ya smacliy te mach'a toj yo'tan, ya sle bin ut'il ya smil;

³³pero te Jehová ma xyac' ochuc ta sc'ab, soc ma xyac' te ya xtahbot smul te c'alal ya x'ich'ot ta c'op.

³⁴Mahliya te Jehová soc t'umbeya sbe; ha me ya yac' tohyuc ac'oblal yu'un yac awich' hilel te q'uinale. Ya me awil te ya yich'ic lajinel te mach'atic chopol yo'tanique.

³⁵Ay quiloj mach'a chopol yo'tan te bayel stoyoj sba, hich slimoj sba te bin ut'il yaxal laurel-te'.

³⁶Pero c'ax bahel, ma ba tey ayix a; la jle, pero ma ba la jta ta lehel.

³⁷Nopa awa'iy bin ut'il ay te mach'a jun yo'tan soc ilawil te mach'a toj yo'tan, yu'un ay bin quechel ya xc'oht ta stojol te mach'a lamal yo'tan.

³⁸Pero spisil te jc'axun-mandaretic ya me yich'ic lajinel; ya me xtup' bahel te sts'umbal te mach'atic chopol yo'tanique.

³⁹Te coltayel yu'un te mach'atic toj yo'tanic, ha ya xtal ta stojol Jehová, ha ahnibal yu'unic ta yorahil wocol.

⁴⁰Te Jehová ya me scoltaylan soc ya me yac'ticlan ta libre; ya yac' ta libre ta stojol mach'atic chopol yo'tanic soc ya scoltay, como snac'oj sbahic ta stojol.