Read Tzeltal Salmos 38 Bible Online

Salmos 38 - Tzeltal bible

Salmos 38

¹Salmo yu'un David scuenta sna'ojibal. Jehová, ma me socuc awilimba yac atsitson, soc ma me xawa'bon castigo soc sc'ahc'al awo'tan.

²La slowonix te ya'tejibalul at'ihmalte', soc c'ohem ta jtojol te ac'abe.

³Mayuc banti lec ta jbaq'uetal ta scaj awilimba; mayuc lamal q'uinal ya ya'iy te jbaquel ta scaj te jmule.

⁴Ts'ahmal q'uinal ya ca'iy yu'un te muliletic cu'un, mero al ta cuchel ya ca'iy.

⁵Te ehchenetic cu'un ya xc'a'ix soc ya xtuhubix scaj te ma jna' q'uinal.

⁶C'ujulix jpat soc mero peq'uel c'ohemonix, spisil c'ahc'al ayon ta mel-o'tan.

⁷Xlemlon sc'ahc'al te jch'ixpat; mayuc banti lec te jbaq'uetale.

⁸Mayuc quip soc mero juch'ulonix; yacon ta ahcan ta scaj sc'uxul c'alal ta co'tan.

⁹Cajwal, ay ta atojol spisil bintic ya sc'an te co'tane, soc ma ba mucul ta asit te jac'jac'-o'tanil cu'une.

¹⁰Ya xwihl co'tan, lajemix quip, ha nix hich ma xyilix q'uinal te jsite.

¹¹Te camigotac soc te jmohloltac namal yac'oj sbahic ta jtojol yu'un te c'a'el cu'une, soc namal yac'oj sbahic te jpat-xuhque.

¹²Te mach'atic ya sc'an ya smilonic ya schahpambonic jyacol, te mach'atic ya sc'an ya yuts'inonic ya yalbonic jc'oblal ta jinel, soc sjunal c'ahc'al ya schahpanic jlo'loyel.

¹³Pero hichon te bin ut'il cohc, ma xca'iy q'uinal, hichon te bin ut'il uma' te ma sjam ye.

¹⁴Hichon te bin ut'il mach'a ma xya'iy q'uinal soc ma sna' bin ya sjac'.

¹⁵Ya jmahliyat, Jehová, ha'at yac ajac', Jehová, Dios cu'un.

¹⁶Hich la jcal: Ma me stse'layonic, ma me stoy sbahic ta jtojol te c'alal ya xbilts'uj coc, xchihon.

¹⁷¡Jteb xanix ya sc'an ma ba xyahlon, soc spisil ora ay ta jtojol ban c'ux ya ca'iy!

¹⁸Ha yu'un ya cal te bin chopol jpasoj, ya jmel co'tan yu'un te jmule.

¹⁹Cuxulic soc ay yipic te jcontratac, soc bayelic te mach'atic tojol nax ya yihlayonic.

²⁰Te mach'atic ya sutic ta bin chopol te bin lec, ya scontrahinonic ta scaj te ha jt'unoj te bin leque.

²¹Ma me xawihquitayon, Jehová, Dios cu'un, ma me namaluc xawac' aba ta jtojol.

²²¡Suja aba, coltayawon, Cajwal, Jcoltaywanej cu'un!