Read Tzeltal Salmos 39 Bible Online

Salmos 39 - Tzeltal bible

Salmos 39

¹Yu'un jach-c'ayoj; yu'un Jedutún. Ha salmo yu'un David. Hich la jcal: Ya jtsahtay jba scuenta yu'un ma ba ya jta jmul soc te cac'; ya cotses freno ta que te c'alal ay ta jtojol te jchopol-o'tanetic, xchihon.

²Ch'abon ta c'op, ma ba c'opojon, ni ha'uc loc' ta que te bin lec ta halele, pero bayel xan te jwocole.

³Mero xpulet ta co'tan la jca'iy; c'alal la jna'ulan ta co'tan, tihl c'ahc', ha yu'un hich la jcal ta tulan:

⁴Jehová, a'bon jna' te bin jlajib ya xc'oht soc jayeb xan c'ahc'al cuxulon; a'bon jna' te jc'axel nax ay te jcuxlejale.

⁵Com nax awac'oj te jayeb c'ahc'al cuxulon, ma ba naht c'ohem ta atojol te jcuxlejale; melel te scuxlejal spisil ants-winiquetic hich nax ay te bin ut'il jahc' ta o'tanil. Selah

⁶Melel te ants-winiquetic hich ayic te bin ut'il axinal te ya xc'ax bahel; tojol ya yac' swocolic ta tulan a'tel, ya stsob sc'ulejalic, pero ma na'biluc mach'a ya yich' hilel.

⁷Yo'tic, Cajwal, ¿bin ya jmahliyix a? Ha'at smuc'ulat co'tan.

⁸Ac'awon ta libre yu'un spisil te jmule; ma me xawac' slabanon te mach'atic ma sna'ic q'uinal.

⁹Ch'abon, ma ba la jam que, como ha'at la apas ini.

¹⁰Loq'uesa ta jtojol te jwocol awu'une; lajemonix yu'un te majel yu'un te ac'abe.

¹¹Ta scuenta castigo yu'un smul yac awac' tojobuc te winic, soc te bin bayel sc'oblal ta yo'tan hich yac alajimbe te bin ut'il pehpen; ¡melel te ants-winiquetic hich nax ayic te bin ut'il jahc' ta o'tanil! Selah

¹²A'iybon jc'op, Jehová, a'iybon awa'iy caw. Ma me xch'abat ta stojol te oq'uel cu'un, como hichon te bin ut'il jyanlum ta atojol, soc jbehyomon, hich te bin ut'il spisil te jme'jtate.

¹³Ma xawilonix, scuenta yu'un ya to ca'iy xan yutsil q'uinal te c'alal ma to xchamon a, xchihon ta stojol.