Read Tzeltal Salmos 40 Bible Online

Salmos 40 - Tzeltal bible

Salmos 40

¹Yu'un jach-c'ayoj. Ha salmo yu'un David. Jun co'tan la jmahliy te Jehová, la yac' tal schiquin ta jtojol, la ya'iybon caw.

²La sloq'ueson ta pozo yu'un mel-o'tan, ta nicnic ahch'al; la yac' tehc'ajucon ta sba muc'ul ton; la yac' te tulan banti ya xbehenon.

³La ya'bon ta que yach'il c'ayoj, ha sc'ayoj yutsilal te Dios cu'untique. Bayel mach'atic ya me yilic soc ya me xi'ic, soc ya me smuc'ulin yo'tanic te Jehová.

⁴Bayel me yutsil te mach'a ha smuc'ulinej yo'tan te Jehová, te ma ha'uc ya sle te mach'atic jtoybahetic soc te mach'atic ya xhowiyic bahel ta stojol te lotil diosetique.

⁵Jehová, Dios cu'un, bayel bintic jelawen yutsil apasoj. Te bintic anopoj ta jtojolcotic ma xhu' ta halel ta atojol; te yacuc calbe sc'oblal, ma xhu' ta ahtayel.

⁶Ma ha'uc ya sc'an awo'tan mahtanil soc milbil mahtanil, pero la ajambon jchiquin; te scohtol chic'bil mahtanil soc mahtanil yu'un stojel mulil ma ha'uc ac'anoj.

⁷Ha yu'un hich la jcal: Li' ayoni, ta balbil hun ts'ihbabil jc'oblal tey a.

⁸Ya jmulan spasel te bin ya sc'an awo'tan, Dios cu'un; ay ta co'tan te Ley awu'un, xchihon.

⁹Calojix ta stojol te muc'ul pueblo te bin stojil ta pasel; Ha'at ana'oj, Jehová, te ma ba la jcom que.

¹⁰Ma ba la jmuc ta co'tan te bin stojil yac apas; la jpuc ta halel te stalel jun awo'tan soc te colel awu'une; ma ba la jmuc ta stojol te muc'ul tsoblej te sc'uxul awo'tan soc te smelelil c'op awu'une.

¹¹Jehová, ma me xacombon te c'uxultayel awu'un; spisiluc me ora yacuc scanantayon te sc'uxul awo'tan soc te smelelil c'op awu'une.

¹²Como ma ahtaybaj bintic chopol te sjoytayejonic; la stahonix te bintic chopol jpasoj, ma xquilix q'uinal yu'un. C'ax hich yipal c'ohemic a te bin ut'il stsotsel jol, soc ya xlaj yip co'tan yu'un.

¹³Awocoluc, Jehová, ac'awon ta libre; la', coltayawon ta ora.

¹⁴Ac'a yich'ic q'uexlaltesel soc howiytesel te mach'atic ya slehbonic jlajel. Ac'a suhticuc ta spatic soc q'uexlaltesel te mach'atic ya sc'an ya yuts'inonic.

¹⁵Ac'a pehc'ajuc yu'un sq'uexlalic te mach'atic ya slabanonic.

¹⁶Pero tse'eluc me yo'tanic soc ayuc me yutsil yo'tanic ta atojol spisil mach'atic ya slehat, soc te mach'atic c'ux ta yo'tanic te colel awu'un, hich ac'a yalic spisil ora: Toyoluc me sc'oblal te Jehová, xchihanic me.

¹⁷Aunque pobrehon soc mayuc bin ay cu'un, ya me sna'on te Jehová. Ha'at jcoltaywanejat soc j'ac'awat ta libre cu'un. ¡Dios cu'un, ma me xhalajatix!