Read Tzeltal Salmos 42 Bible Online

Salmos 42 - Tzeltal bible

Salmos 42

¹Yu'un jach-c'ayoj. Ha Masquil[11] yu'un te snich'nab Coré. Hich te bin ut'il xtaston ta slehel yuch' ha' te chij, hich ya slehat te jch'uhlel, Dios cu'un.

²Ay taquinti'il ya ya'iy te jch'uhlel ta stojol Dios, ha te cuxul Diose. ¿Bin ora ya xtal jtehc'an jba ta stojol te Diose?

³Ha jwe'el c'ohem te ya'lel jsit jujun c'ahc'al, ahc'abal, te c'alal hich ya yalbonic spisil ora: ¿Banti ay te Dios awu'un? te xchihique.

⁴Ha ya jna'ticlan ini soc ya xtal mel-o'tan yu'un: ha te bin ut'il la joquin bahel tsobolic soc la jquic'ticlan bahel ta sna Dios, ta scuenta aw yu'un yutsil q'uinal ya ya'iyic soc halbeyel wocol Dios te pueblo te yac ta spasel q'uin.

⁵¿Bin yu'un ya xlaj awip, jch'uhlel, soc te ayat ta mel-o'tan? Ac'a smuc'ulin awo'tan te Diose, yu'un ya to calbe xan yutsil sc'oblal te Jcoltaywanej soc te Dios cu'une.

⁶Dios cu'un, mayuc yip te jch'uhlel; ha yu'un bayel ya jna'at c'alal ta sq'uinal Jordán, c'alal ta switsul Hermón, ta wits Mizar.

⁷Ya sjac' sba ta a'iyel ta sc'ubulil ch'entiquil te stulanil sc'op te swihlib ha'etic awu'une; spisil te tulan stselajan ha' awu'un c'axemiquix ta jba.

⁸Pero ta c'ahc'alel ya sticon tal sc'uxul yo'tan te Jehová, soc ta ahc'abal ya sjoquinon te c'ayoj yu'une, ha te bin ya cal ta stojol te Dios yu'un te jcuxlejale.

⁹Hich ya calbe te Diose: Muc'ul tonat cu'un, ¿bin yu'un la ach'ayonix ta awo'tan? ¿Bin yu'un ayon ta mel-o'tan ta scaj te uts'inel yu'un te jcontra? xchihon.

¹⁰Ya slabanonic te jcontratac hich te bin ut'il mach'a ya yehchentesbon jbaquel, te bin ut'il hich ya yalbonic jujun c'ahc'al: ¿Banti ay te Dios awu'un? xchihic.

¹¹¿Bin yu'un ya xlaj awip, jch'uhlel, soc te ayat ta mel-o'tan? Ac'a smuc'ulin awo'tan te Diose, yu'un ya to calbe xan yutsil sc'oblal, te Jcoltaywanej soc te Dios cu'une.