Read Tzeltal Salmos 44 Bible Online

Salmos 44 - Tzeltal bible

Salmos 44

¹Yu'un jach-c'ayoj. Ha Masquil[12] yu'un te snich'nab Coré. Dios cu'un, ca'iyej ta jchiquincotic, la yalbotcotic te me'iltatiletic cu'uncotic te bin la apas te c'alal cuxulic a, ha te bin la apas ta namey.

²Ha'at ta ac'ab la atenticlan loq'uel te nacionetic soc la ats'un tey a te me'iltatiletique; la awa'be swocol te pueblohetic, yan te jme'jtatcotic la awac' te lec ya xc'ohtic.

³Como ma ba la yochintayic te q'uinal ta scuenta te espada yu'unic, soc ma ha'uc ta sc'abic la ya'iyic tsalaw; ha ta scuenta awa'el-c'ab soc te sts'anabul asit awelaw, como lec awo'tan ta stojolic.

⁴Ha'at Ajwalilat cu'un, Diosat cu'un; ac'a te ya ya'iy tsalaw te Jacob.

⁵Ta acuenta ya jtsalcotic te jcontracotic; ta scuenta abihil ya jts'o'ticlancotic ta teq'uel te jcontracotique.

⁶Ma ba ya smuc'ulin co'tan te jt'ihmalte', soc ma ba ya scoltayon te espada cu'un;

⁷ha'at la awac'otcotic ta libre yu'un te jcontracotic, ha'at la awac' q'uexawuc te mach'atic ya sp'ajotcotique.

⁸¡Ta spisil ora bayel yutsil co'tantic ta stojol Dios, spisil ora ya calbecotic yutsilal te abihile! Selah

⁹Pero yo'tic la ach'ojotiquix loq'uel ta atojol, la awac'otiquix ta q'uexlal. Ma ba ya xloc'atix ta guerra soc te soldadohetic cu'uncotique.

¹⁰La awac' suhtotcotic ta stojol te contracotic, ya yelc'ambotcotic jbilucotic te mach'atic ya sp'ajotcotique.

¹¹La awac'otiquix ta lajel hich te bin ut'il tuminchijetic soc la apucotcotic bahel ta stojol te nacionetique.

¹²C'ax peq'uel la achon te pueblo awu'un, ¡mayuc bin loc' awu'un a!

¹³La awac'otcotic ta halel yu'un te jpat-xuhcotic, ya stse'layotcotic soc ya slabanotcotic.

¹⁴La awac'otcotic ta tsahbil c'op ta yohlil te nacionetic; spisil mach'atic ya yilotcotic ya sjimulan sjolic.

¹⁵Spisil ora ay ta jtojol te jq'uexlal, soc macal jsit quelaw yu'un q'uexlal

¹⁶yu'un te sc'op te mach'a ya slabanon soc ma xyich'on ta cuenta, ta scaj te jcontra soc te mach'a ya yac' spacol.

¹⁷C'ohtix ta jtojolcotic spisil ini, aunque ma ba ch'ayemat ta co'tancotic soc ma ba ch'ayem cu'uncotic te chapbil-c'op awu'une.

¹⁸Ma ba yanijem co'tancotic soc ma ba quihquitayejcotic te be awu'un,

¹⁹yu'un hich yac ach'ojotcotic bahel ta banti ay ha'mal ts'i'etic soc yac amucotcotic ta yaxinal lajel.

²⁰Te ha'uc ch'ayem ta co'tantic te sbihil te Dios cu'untic, o te lajuc jtoy jc'abtic ta stojol yan diosetic,

²¹¿ma bal lajuc sna' te Diose? como ha sna'oj spisil te bin muquen ay ta o'tanil.

²²Pero ha'at ta acuenta te spisil ora quechelotcotic ta lajel; hichotcotic te bin ut'il tuminchijetic te ya yich'ic milele.

²³¡Cuxa awo'tan! ¿Bin yu'un wayalat, Cajwal? ¡Hahchan! Ma me ch'aybiluc ya xhilotcotic awu'un spisil ora.

²⁴¿Bin yu'un yac anac' asit awelaw, soc ya xch'ay ta awo'tan te jwocolcotic soc te uts'inel cu'uncotique?

²⁵Como jc'axel pehc'ajemotiquix c'alal ta ts'u'lum, soc stahojix c'alal lum te jbaq'uetalcotique.

²⁶¡Hahchan yu'un yac acoltayotcotic, ac'awotcotic ta libre ta scuenta te sc'uxul awo'tane!