Read Tzeltal Salmos 47 Bible Online

Salmos 47 - Tzeltal bible

Salmos 47

¹Yu'un jach-c'ayoj. Salmo yu'un te snich'nab Coré. ¡Pac'a ac'abic apisilic, pueblohetic! ¡Soc yutsil awo'tanic halbeyahic yutsil sc'oblal te Diose!

²Como ay ta xi'el te Jehová te mero toyol ay, ha Muc'ul Ajwalil ta swohlol bahlumilal.

³Ha ya yac' te ya yac' sbahic ta jtojoltic te pueblohetic, ya yac' ta ye'tal coctic te nacionetique.

⁴Ha la slehbotic te bin ya quich'tic hilel, ha te bin c'ax t'ujbil la yil te Jacob, te mach'a c'ux la ya'iy ta yo'tan. Selah

⁵¡Te Dios mohix bahel soc aw scuenta yutsil q'uinal, mo bahel Jehová soc yoq'uel corneta!

⁶¡C'ayojtaybeyahic yutsilal te Diose, c'ayojtayahic! ¡C'ayojtaybeyahic yutsilal te Ajwalil cu'untic, c'ayojtayahic!

⁷Como te Dios ha Muc'ul Ajwalil yu'un swohlol bahlumilal; ¡c'ayojtayahic c'ayojetic ta stojol!

⁸Te Dios ay ta ajwalil yu'un te nacionetic; te Dios hucul ta ch'ul smuc'ul-huctajib.

⁹Te príncipaletic yu'un te pueblohetic hich la stsob sbahic te bin ut'il te pueblo yu'un te Dios yu'un Abraham,

¹⁰como ha yu'un Dios te mahquilaletic[15] yu'un te bahlumilal; ¡ha bayel toybil sc'oblal!