Read Tzeltal Salmos 49 Bible Online

Salmos 49 - Tzeltal bible

Salmos 49

¹Yu'un jach-c'ayoj. Ha salmo yu'un te snich'nab Coré. A'iya awa'iyic ini, ta apisilic pueblohetic; a'iya awa'iyic ta apisilic te nahinemex ta bahlumilal,

²te mach'atic peq'uelic soc te ich'bilic ta muc', jc'ulej soc pobre.

³Ya me cal p'ijil c'op, te bin jnopoj ta co'tan ya yac' p'ijil-o'tanil.

⁴Ya cac' jchiquin a te tsahbil c'opetic; ya cal soc arpa cu'un te bin wocol ta na'ele.

⁵¿Bin yu'un ya xiwon ta sc'ahc'alel wocol, te c'alal ya sjoytayon te bin chopol yu'un te jcontrataque?

⁶Ha te mach'atic smuc'ulinej yo'tanic te bintic ay yu'unic soc te ya stoy sbahic yu'un te bayel sc'ulejalic.

⁷Mayuc mach'a ya xhu' ya scoltay loq'uel ta libre te yermano o te ya ya'be Dios te stojol te ya xloc' ta libre,

⁸(como c'ax bayel stojol te ya yich' mambeyel scuxlejal, ma xhu' ta tahbeyel te stojole),

⁹scuenta yu'un ya xcuxaj sbahtel q'uinal a, te ma ba ya yil te ya xc'a'e.

¹⁰Como chican ta ilel te ya xchamic te mach'atic p'ijic; te pajal ya xlajic soc te sonso soc te mach'a ma sna' q'uinal, soc yan mach'atic ya yich'ic te sc'ulejalique.

¹¹Te smuquenalic ha snahic sbahtel q'uinal,[16] ha snahic ya xhil ta cajalcaj ts'umbalil, aunque la sbihilin sq'uinalic te sbihilique.

¹²Pero te ants-winic ma sbahteluc q'uinal cuxul, aunque jc'ulej; ¡pajal ay soc chambahlametic te ya xchamique!

¹³Hich ya xc'ohtic te mach'atic ya yich' sbahic ta muc', hich ya xch'ayic bahel te mach'atic ya yalic yutsil sc'oblalic. Selah

¹⁴Hich te bin ut'il tuminchijetic macbilic bahel ta lajel, hich ya xcanantayotic yu'un te lajele. Ta sab ya xcuentahinotic yu'un te mach'atic toj yo'tanic; ya xlaj te st'ujbilalic, ha snahic ya xc'oht te muquenale.

¹⁵Pero Dios ya scoltaybon loq'uel jcuxlejal ta yip te muquenal, como ya me yic' sjoquinon. Selah

¹⁶Ma me xc'opoj awo'tan yu'un teme ay mach'a ya sta sc'ulejal, te c'alal t'ujbil ya xc'oht te snahe,

¹⁷como te c'alal ya xcham mayuc bin ya yich' bahel, ma ba ya xt'unot cohel yu'un te yutsilale.

¹⁸Te c'alal cuxul to, aunque ya yalbe sba lec sc'oblal, soc ya xhalot lec sc'oblal yu'un te ay bin ay yu'une,

¹⁹ya me sjoquin te jcaj ts'umbalil yu'un sme'stat, mayuc bin ora ya yilix te sacal q'uinale.

²⁰Te ants-winic te ay sc'ulejal pero mayuc sp'ijil, pajal soc chambahlametic te ya xchamique.