Read Tzeltal Salmos 5 Bible Online

Salmos 5 - Tzeltal bible

Salmos 5

¹Yu'un jach-c'ayoj; soc flautas. Ha salmo yu'un David. A'iybon awa'iy jc'op, Jehová, ich'bon ta cuenta te ahcan cu'une.

²A'iybon awa'iy te caw, Ajwalilat soc Diosat cu'un, como ha'at ya jc'oponat.

³Jehová, ta sab yac awa'iybon jc'op; ta sab ya calbat te bin ya jc'ambat, soc ya jmahliy te suhtibe.

⁴Como ha'at Diosat te ma lecuc awo'tan yu'un te bin chopole, te mach'a chopol ma ba ya xnahin ta ats'ehl.

⁵Ma ba ya x'ayinic ta atojol te mach'atic jtoybahetic, yac ap'aj spisil mach'atic ya spasic te bin chopole.

⁶Yac alajinlan te mach'atic ya ya'iyic lot, yac awihlay te jmilaw soc te jlo'loywanej.

⁷Yan te ho'one, ta scuenta bayel sc'uxul awo'tan ya x'ochon ta Na awu'un; ta scuenta quich'belat ta muc' ya jquejan jba ta stojol te ch'ul Templo awu'une.

⁸Tojobtesawon bahel, Jehová, ta scuenta stojil awo'tan, ta scaj te jcontratac; tojobtesa ta jtojol te be awu'une.

⁹Mayuc smelelil te bin ya yalic; nojel ta mulil te yo'tanique; ha jamal muquenal te yehic; ay bahba-c'op ta yehic.

¹⁰¡Ac'ticlambeya castigo, Dios cu'un! ¡Ac'a yahluquic yu'un te bin ha nix schapojique! Loq'uesa bahel ta scaj bayel smulic, como stoyoj sbahic ta atojol.

¹¹Pero tse'eluc me yo'tanic spisil mach'atic ya smuc'ulinat yo'tanic; spisiluc ora ac'a c'ayojinuc soc yutsil yo'tanic, como ha'at yac acanantay; tse'el yo'tanic ta acuenta te mach'atic c'ux ta yo'tanic te abihile.

¹²Ha'at, Jehová, yac awa'be bendición te mach'a toj yo'tan; hich te bin ut'il mahquilal yac ajoytay a ta yutsil awo'tan ta stojol.