Read Tzeltal Salmos 50 Bible Online

Salmos 50 - Tzeltal bible

Salmos 50

¹Salmo yu'un Asaf. Te Dios yu'un yantic diosetic, te Jehová, ha c'opojix soc la yic'ticlanix tal te mach'atic ayic ta bahlumilal c'alal banti ya xloc' tal c'ahc'al ha to c'alal ta smahlib c'ahc'al.

²Dios yac'oj tal sts'anabul c'alal ta Sión, te ha mero t'ujbil.

³Ya me xtal te Dios cu'untic, ma ba ya xch'ab; ay c'ahc' ta stojol te ya xlajinwan soc joytaybil ta tulan ic' ta sjoyobal.

⁴Ya yic' tal te ch'ulchan ta toyol soc te bahlumilal, scuenta yu'un ya yich' ta c'op te pueblo yu'une.

⁵Hich la yal: Tsobahic te mach'atic cu'un te ch'uhltesbilic, ha te mach'atic la schap sc'opic ta jtojol ta scuenta milbil mahtanil, xchi te Diose.

⁶¡Te ch'ulchan ya me yal ta jamal te toj bin ya spas, como ha jchahpanwanej te Diose! Selah

⁷A'iya awa'iy, pueblo cu'un, ya xc'opojon; a'iya awa'iy, Israel, ya xc'opojon ta acontra: Ho'on te Dioson awu'un.

⁸Ma ba ya jtijat ta c'op yu'un te milbil mahtaniletic awu'un soc te scohtol chic'bil mahtaniletic te spisil ora ay ta jtojol.

⁹Ma ba ya jc'ambat torohetic te ay ta ana o tat tentsunetic ta yawil chambahlametic awu'un,

¹⁰como ho'on cu'un spisil ha'mal chambahlametic, soc te bayel ta mil wacaxetic ayic ta witsiltic.

¹¹Ya jna'be sba spisil te mutetic ta witsiltic, soc ho'on cu'un spisil te bintic ya snihc sbahic ta q'uinal.

¹²Te ayuc jwi'nal, ma ba ya calbat te ha'ate, como ho'on cu'un te bahlumilal soc spisil bintic ay tey a.

¹³¿Ya bal jwe'be sti'balul torohetic, o ya bal cuch'be sch'ich'el tat tentsunetic?

¹⁴Ha'uc me smahtan awu'un ta stojol Dios te yalbeyel wocol, soc pasa te bin awalbeyej ta jamal te Dios te mero toyol ay.

¹⁵C'oponawon te c'alal ayat ta wocol; ya cac'at ta libre, soc ya me awich'on ta muc', xchi te Jehová.

¹⁶Yan te mach'a chopol hich ya xhalbot yu'un Dios: ¿Bin awochel a te yac atahbon ta halel te mandariletic cu'un, soc te yac atahbon ta halel te c'op chapal cu'une?

¹⁷Yac ap'aj te tojobtesel cu'un soc yac awac' ta apat te jc'ope.

¹⁸Teme yac awil j'elec', ora yac ajoquin; jun yac awac' aba soc te j'antsiwejetique.

¹⁹Ya xtuhun awe ta yalel bin chopol, soc te awac' ya xchahpan lo'loywanej.

²⁰Yac ahuhcan aba, ya xc'opojat ta scontrahinel awermano, yac alehbe smul te yal te anane.

²¹Hich la apas, pero mayuc bin la jcal yu'un; la acuy te hichon te bin ut'il ha'at. Pero ya me jtijat ta c'op, ya calbat amul ta asit.

²²Ac'a c'ohtuc ta awo'tan ini, ha'ex te yac ach'ay ta awo'tanic te Diose, te manchuc ya jtuch'ticlanex, hich mayuc mach'a ya scoltayex.

²³Te mach'a ya yalbon wocol te ha jmahtan yu'un, ha ya yich'on ta muc'; te mach'a toj ya xbehen, ya ca'be yil te colel yu'un Dios, xchi te Jehová.