Read Tzeltal Salmos 55 Bible Online

Salmos 55 - Tzeltal bible

Salmos 55

¹Yu'un jach-c'ayoj. Masquil yu'un David. Dios cu'un, a'iybon jc'op, ma xamacbon te bin ya calbat wocol yu'une,

²a'iybon jc'op soc jac'bon. Ya xc'opoj co'tan yu'un jwocol, pich'il co'tan yu'un

³ta scaj te sc'op te jcontra, ta scaj te uts'inel yu'un te mach'a chopol; como la ya'bonic c'axuc jwocol, soc sc'ahc'al yo'tanic ya yuts'inonic.

⁴Ya xwihl co'tan yu'un; tal ta co'tan te xiwel yu'un lajel.

⁵Tal ta jtojol xiwel soc nihquel, ya smucon te xiwele.

⁶Hich ya cal: ¡Te ayuc mach'a ya ya'bon jxic' hich te bin ut'il stsuhmut! Ya xwihlon bahel soc ya jcux co'tan te hichuque.

⁷Namaluc ya x'ahnon bahel, ya xnahinon ta jochol taquin q'uinal te hichuque. Selah

⁸Ora ya xloc'on bahel ta ahnel ta stojol te tulan ic' te hichuque, xchihon.

⁹Lajinlana, Jehová, te mach'atic chopolic, yanijtesbeya te sc'opique, yu'un ya quil uts'inel soc hahch c'op ta pueblo.

¹⁰C'ahc'al ahc'abal ya sjoyintayic ta sba te sts'acule; ay mulil soc uts'inel ta yohlil te pueblo.

¹¹Ay lajinel tey a, stalel ay uts'inel soc lo'loyel ta callehetic yu'un.

¹²Te ha'uc jcontra te la slabanon, ya xcuhch cu'un te hichuque; soc te ha'uc mach'a ya sp'ajon te la scontrahinon, ya xhu' ya jnac' jba ta stojol te hichuque.

¹³Pero ha'at nix, te mach'a pajal ayon soc, te jmohlol jbahtic, te jun co'tan jbahtic,

¹⁴te pajal buen t'ujbil c'opojotic, soc pajal behenotic soc bayel ants-winiquetic ta sna Dios.

¹⁵Repente nax ac'a stahic lajel te jcontratac; cuxul a ac'a cohuquic bahel ta muquenal, como ay ta yohlilic te bintic chopole.

¹⁶Yan te ho'one ya cawtay te Diose, ya scoltayon stuquel te Jehová.

¹⁷Ta tibiltic, ta sab soc ta ohlil c'ahc'al ya xc'opojon soc ya x'awonon, ha me ya ya'iybon jc'op.

¹⁸Ya scoltayon loq'uel ta guerra te ay ta jtojol, aunque bayel te jcontrataque.

¹⁹Dios, te stalel ya xcuentahinwan, ya me ya'iy soc ya me spehc'anlan, como ma ba ya xjelon yo'tanic soc ma ba ya xi'ic te Diose. Selah

²⁰Te mach'a chopol ya shach sc'ab ta scontrahinel te mach'atic pajal lamal yo'tan sbahic soc; ya slajimbe sc'oblal te chapbil-c'op yu'unique.

²¹Buen c'un ta a'iyel te sc'op, c'ax hich a te bin ut'il mantequilla, pero ay guerra ta yo'tan; c'un te sc'ope, c'ax hich a te bin ut'il aceite, pero hich c'ohemic te bin ut'il espadahetic loq'uesbilic ta sna.

²²A'beya Jehová te bin ay awocol yu'un, ha me ya ya'bat awip; mayuc bin ora ya yac' yahluc te mach'a toj yo'tan.

²³Pero ha'at, Dios cu'un, yac awac' cohuquic bahel ta xahab yu'un lajel te mach'atic chopolic. Te jmilawetic soc te jlotetic ma ba ya sta j'ohlil te scuxlejalique. Yan te ho'one, ha'at smuc'ulat co'tan.