Read Tzeltal Salmos 57 Bible Online

Salmos 57 - Tzeltal bible

Salmos 57

¹Yu'un jach-c'ayoj; ta sc'ayojil Ma me xajin. Mictam yu'un David, c'alal loc' ta ahnel ta stojol Saúl, och ta ch'en. C'uxultayawon, Dios cu'un, c'uxultayawon, como snac'oj sba ta atojol te jch'uhlele; ya jnac' jba ta yaxinal axic' ha to c'alal c'axix bahel a te wocole.

²Ya x'awonon ta stojol Dios te mero toyol ay, ha te Dios te ya sc'uxultayon.

³Ya me sticon tal c'alal ta ch'ulchan ta scoltaybelon, ya me yac' q'uexawuc te mach'atic ya yuts'inonique. Selah Dios ya sticombon tal sc'uxul yo'tan soc stalel jun yo'tan ta jtojol.

⁴Ayon ta yohlil chojetic, ta yohlil winiquetic te ya xehtayic c'ahc'; te sbaquel yehic pajal soc lanzahetic soc ya'tejibalul t'ihmalte'etic, te yaq'uic pajal soc espada te ay ye.

⁵¡Toybiluc ac'oblal, Dios cu'un, ta sba ch'ulchan! ¡Ac'a nojuc ta swohlol bahlumilal te awutsilale!

⁶La spasbonic syacol te coc; mayuquix smuc'ul co'tan ya ca'iy; la shotic ch'en te banti ya xbehenon, pero ha'ic nix tey yahlic cohel a. Selah

⁷Jun co'tan, Dios cu'un, jun co'tan; ya xc'ayojinon, ya jc'ayojtay c'ayojetic.

⁸¡Cuxa awo'tan, jch'uhlel! ¡Cuxa awo'tan ha'ex arpa soc lira! Sahb me ya xhahchon.

⁹Ya calbat yutsil ac'oblal, Cajwal, ta yohlil te pueblohetic, ya jc'ayojtayat ta yohlil te nacionetique,

¹⁰como muc' te sc'uxul awo'tan, c'ohem c'alal ta ch'ulchan; soc c'alal ta tocal te stalel jun awo'tan ta jtojolcotique.

¹¹¡Toybiluc ac'oblal, Dios cu'un, ta sba ch'ulchan! ¡Ac'a nojuc ta swohlol bahlumilal te awutsilale!