Read Tzeltal Salmos 60 Bible Online

Salmos 60 - Tzeltal bible

Salmos 60

¹Yu'un jach-c'ayoj; ta sc'ayojil Liriohetic, ha testigo-c'op. Ha Mictam yu'un David scuenta nohptesel, te c'alal la ya'be guerra te Aram-Naharaim soc Aram de Soba, soc te suht tal Joab, la slajin j'ohlil scha'pic (12,000) ta tuhl yu'un Edom ta spamlej yu'un Ats'am. Dios cu'un, la ap'ajotcotic, la ajinotcotic; ilinemat. ¡Suhtan tal ta jtojolcotic!

²La awac' nihcuc soc la ajat te lumq'uinale; lecubtesa te banti jatemic, como yac ta nihquel.

³La awa'be yil tulan pruebahetic te pueblo awu'un; la awa'botcotic vino te ya x'ahlajanotcotic yu'une.

⁴Yan te mach'atic ya xi'at la awa'be sbandera te ya yich' toyel mohel ta scaj te smelelil c'ope. Selah

⁵Coltaya ta swa'el ac'ab soc a'iybon jc'op scuenta yu'un hich ya xcolic ta libre te mach'atic c'uxic ta awo'tane.

⁶Hich yaloj Dios ta ch'ul templo yu'un: Tse'el co'tan ya jpucticlan te Siquem soc ya jp'is te spamlej yu'un Sucot.

⁷Ho'on cu'un te Galaad soc Manasés; ha smahquil jol te Efraín; te Judá ha jbastón yu'un pasaw ta mandar;

⁸te Moab ha vasija yu'un ya jpoc jc'ab a; ya jch'oj bahel jtep ta stojol Edom; ya x'awonon scuenta tsalaw ta stojol Filisteo, xchi te Diose.

⁹¿Mach'a ya yic'on bahel ta pueblo te ay sjoyob ts'ahcul? ¿Mach'a ya yic'on bahel c'alal Edom?

¹⁰¿Ma bal ha'ucat, Dios cu'untic, te la ap'ajotcotic soc te ma ba ya xloc'atix bahel soc te soldadohetic cu'uncotique?

¹¹Coltayawotcotic ta sc'ab te jcontracotic, como tojol te coltayel yu'un winiquetic.

¹²Ta scuenta Dios ya jpastic bintic muc' ta pasel, ha me ya sts'o' ta teq'uel te jcontratique.