Read Tzeltal Salmos 62 Bible Online

Salmos 62 - Tzeltal bible

Salmos 62

¹Ha nax ta stojol Dios ya jta lamal q'uinal, ha ya xtal ta stojol stuquel te jcolele.

²Ha nax stuquel te muc'ul ton soc te colel cu'une; ha ahnibal cu'un, ma ba ya xyahlonix.

³¿Jayeb xan ora yac acontrahinic jtuhl winic, te yac atenic ta apisilic hich te bin ut'il pahc' te yaquix ta buchel, hich te bin ut'il corral te jimbilixe?

⁴Ha nax ya snopic te ya sjinic cohel te banti toyol ay; ha c'ux ta yo'tanic te lote. Ya yalbeyic lec sc'oblal ta yehic, pero ta yo'tanic ya yalbe chopol sc'oblal. Selah

⁵Ha nax ta stojol Dios ya jta lamal q'uinal, ha ya xtal ta stojol stuquel te smuc'ul co'tane.

⁶Ha nax stuquel te muc'ul ton soc te colel cu'une; ha ahnibal cu'un, ma ba ya xyahlonix.

⁷Ay ta stojol Dios te jcolel soc te yutsil jc'oblale; ha muc'ul tulan ton soc ha ahnibal cu'un te Diose.

⁸¡Ac'a smuc'ulin awo'tanic spisil ora, pueblohetic! ¡Halbeyahic bin ay ta awo'tanic! ¡Ha ahnibal cu'untic te Diose! Selah

⁹Te ants-winiquetic te peq'uel ayic ha nax sahb ye, te mach'atic muc' sc'oblalic ma ba smelelil; te pajaluc ya yich'ic licbeyel yalalic ta balanza, pajal mayuc yalalic te hichuque.

¹⁰Ma me smuc'ulin awo'tanic te uts'inwanej, ma me xatoy abahic yu'un te bintic elc'ambilique. Teme ya xp'ohl c'ulejalil, ma xawac' awo'tanic tey a.

¹¹Jun buelta c'opoj Dios: cheb buelta ca'iyej ini: te ay yu'el te Diose,

¹²soc ha'at awu'un, Cajwal, te c'uxultaywanej. Ta jujutuhl yac awa'be stojol sc'abic, ha chican bin yilel te ya'telique. Salmo yu'un David te c'alal ay ta jochol taquin q'uinal yu'un Judá.