Read Tzeltal Salmos 66 Bible Online

Salmos 66 - Tzeltal bible

Salmos 66

¹Yu'un jach-c'ayoj. Salmo. Awonanic ta stojol Dios soc yutsil awo'tanic, swohlol bahlumilal.

²C'ayojtaybeyahic yutsilal te sbihile; t'ujbil ac'a c'ohtuc te yalbeyel yutsilale.

³Halbeya te Diose: ¡Mero jchahp a te a'teliletic awu'un! Ta scuenta te smuc'ul awu'el ya me squejan sbahic ta atojol te acontrataque.

⁴Spisil mach'atic ayic ta bahlumilal ya sch'uhuntayat, ya sc'ayojtayat, ya sc'ayojtaybat abihil, xchihanic me ta stojol. Selah

⁵¡La'ic, ilawilic te ya'tel Dios, te jchahp te bintic la spas ta stojol te ants-winiquetique!

⁶La sc'atp'un ta taquin lum te mar, ta yoquic sohlic bahel ta jehch ha'. Tey buen tse'el co'tantic ta stojol a.

⁷Ta scuenta yu'el ya xcuentahinwan sbahtel q'uinal; ya st'ojan sit ta yilel te nacionetique; te mach'atic jtoybahetic ma me stoy sbahic ta stojol. Selah

⁸Nacionetic, halbeyahic lec sc'oblal te Dios cu'untic, ac'a chicnajuc te yalbeyel yutsil sc'oblale.

⁹Ha la yac' te cuxulotic soc ma ba la yac' bilts'uj te coctique.

¹⁰Como ha'at la apasotcotic ta prueba, Dios cu'untic, ha'at la alecubtesotcotic hich te bin ut'il ya yich' lecubtesel plata.

¹¹La awac'otcotic ochel ta yaquil; la awac' jcuchcotic buen al ihcatsil.

¹²La awac' sts'o'botcotic ta teq'uel jolcotic te winiquetic; c'axotcotic ta c'ahc' soc ha', pero la awac'otcotic ta banti ay bayel bintic ay.

¹³Ya x'ochon ta templo awu'un soc scohtol chic'bil mahtanil, ya jpas te bin caloj ta atojol,

¹⁴ha te bin la jcal ta que te bin ora ayon ta wocol a.

¹⁵Ya ca'bat buen juhp'en chambahlametic scuenta scohtol chic'bil mahtanil, soc ya ca'bat tat tentsunetic; ya ca'bat torohetic soc tentsunetic scuenta chic'bil mahtanil. Selah

¹⁶¡La'ic, a'iya me awa'iyic apisilic te awich'ojic ta muc' te Diose, ya calbeyex awa'iyic te bin la spasbon!

¹⁷La jcawtay, la jcalbe yutsil sc'oblal.

¹⁸Te ayuc bin chopol jnopoj ta co'tan, ma ba la ya'iybon jc'op te Cajwal te hichuque.

¹⁹Pero la ya'iybon jc'op te Diose, la yich'bon ta cuenta te bin la jcalbe wocol yu'un.

²⁰¡Bayeluc me yutsil sc'oblal te Dios, te ma ba la sp'ajbon te bin la jcalbe soc ma ba la scom te sc'uxul yo'tan ta jtojol!