Read Tzeltal Salmos 69 Bible Online

Salmos 69 - Tzeltal bible

Salmos 69

¹Yu'un jach-c'ayoj; ta sc'ayojil Liriohetic. Ha salmo yu'un David. ¡Coltayawon, Dios cu'un, como stahojix jnuc' te ha'e!

²Mulbilonix cohel ta ahch'al te c'ubul ay, te banti ma xhu' ya yich' yip te coque. Jtahojix c'ohel sc'ubulil ha', soc yac yehambelon te yacan ha'.

³Luhbenonix ta sc'anel coltayel; mahquemix coq'uib yu'un. Luhbix jsit ta smahliyel te Dios cu'une.

⁴Te mach'atic ay slab yo'tanic cu'un ta tojol nax, c'ax hich p'ohlemic a te bin ut'il stsotsel jol; yich'oj yipic te jcontratac, te mach'atic ya sc'an ya slajinonic te mayuc bin jpasoje. ¿Ya bal xpas ya jtoj te bin ma ba quelc'anej?

⁵Dios cu'un, ha'at ana'oj te ma jna' stsahtayel jba; ma ba mucul ta asit te muliletic cu'une.

⁶Manchuc me ya stahic q'uexlal ta jcuenta te mach'atic smuc'ulinejat yo'tanic, Cajwal, Jehová te scuentahinej spisil; manchuc ya stahic lo'loyel ta jcuenta te mach'atic ya slehat, Diosat yu'un Israel.

⁷Ha'at ta acuenta te c'ax jwocol ta ixta'c'optayel, macbil quelaw ta q'uexlal.

⁸Jyanlum c'ohon yu'un te quermanotac, ma sna'bonic jba te yalatac te jnane.

⁹Ya xlajon ya ca'iy yu'un te xut'et co'tan yu'un te anahe, soc c'oht ta jtojolte ixta'c'optayel yu'un te mach'atic ya yixta'c'optayat.

¹⁰Te c'alal ya x'oc'on soc ya jcom jwe'el, ya quich' labanel yu'un;

¹¹teme ya jlap pac' scuenta mel-o'tan, ho'on j'ac'-tse'ejon yu'unic ya xc'ohon.

¹²Te mach'atic huculic ta yochibal te pueblo ya scontrac'optayonic, soc ya slabonic ta c'ayoj te jyacubeletique.

¹³Pero ya jc'oponat, Jehová, ta yorahil te lecon ta awo'tan; Dios cu'un, ta scuenta bayel sc'uxul awo'tan, ta scuenta te melel ay colel awu'un, jac'bon me te jc'ope.

¹⁴Loq'uesawon ta ahch'al, te manchuc ya sbic'on cohel; coltayawon loq'uel ta sc'ab te mach'atic ya sp'ajonic, soc ta sc'ubulil te ha'e.

¹⁵Ma me xawac' ya yehanon te yacan ha', o te ya sbic'on cohel te xahab, o te ya smacon te sti'il te hotbil ch'en.

¹⁶Jac'bon jc'op, Jehová, como lec te sc'uxul awo'tan; ta scuenta hich yipal sts'ujulil awo'tan suhtan tal ta jtojol.

¹⁷Ma me xamac asit ta stojol te a'bat awu'un; ¡suja aba, a'iybon jc'op ta ora, como ayon ta wocol!

¹⁸¡Nohpojan ta jts'ehl, coltayawon! ¡Coltayawon loq'uel ta sc'ab te jcontrataque!

¹⁹Ha'at ana'oj te ayon ta labanel, ta q'uexlal soc ta uts'inel; ay ta atojol spisil te jcontrataque.

²⁰La slajimbon co'tan te uts'inel, mayuquix bin ya scoltayon. La jmahliy mach'a ya sna'bon yo'bolil jba, pero mayuc; la jle mach'a ya yac' smuc'ul-o'tanil, mayuc jtuhluc la jta.

²¹La ya'bonic jwe' bin ch'a scuenta jwe'el, soc te c'alal taquij co'tan la ya'bonic cuch' vinagre.

²²Te swe'elic scuenta q'uin ac'a sutp'ijuc ta schucojibal, te bintic lec yu'unic ac'a c'atp'ijuc ta yaquil.

²³Ac'a mahcuc sitic yu'un ma ba ya yilic q'uinal a, soc ac'a nihcuc spisil ora te yacanique.

²⁴Mala awilimba ta stojolic; ac'a tahotuc yu'un te yip sc'ahc'al awo'tan.

²⁵Jochol ac'a hiluc te campamento yu'unic, ma me ayuc mach'a ya xnahin ta snahilpaq'uic.

²⁶Como ya yuts'inic te mach'atic la awehchentes, soc ya yalbe sbahic sc'oblal te sc'uxul te mach'atic ehchentesbilic awu'une.

²⁷A'beya bin chopol ta sba te bin chopol spasojic, ma me xawal te mayuc smulic.

²⁸¡Ac'a yich'ic tup'beyel sbihilic ta libro yu'un mach'atic cuxajtic, ma me x'ochic ta lista yu'un te mach'atic toj yo'tanique!

²⁹Pero te ho'one, ayon ta wocol soc ay bin c'ux ya ca'iy; ac'a scanantayon te coltayel awu'un, Dios cu'un.

³⁰Ya jc'ayojtaybe yutsil sbihil te Dios cu'une; ya jtoybe sc'oblal ta yalbeyel wocol ta stojol.

³¹C'ax hich lec yo'tan yu'un a te Jehová te bin ut'il teme a'bot milbil smahtan j'a'tel-wacax, c'ax hich a te bin ut'il teme a'bot jcolel toro te ay xulub soc slots'.

³²Te mach'atic pich'il yo'tanic ya me yilic, tse'el me yo'tanic yu'un. Te mach'atic ya slehic te Diose ac'a yich' xan yip awo'tanic.

³³Como te Jehová ya ya'iybe sc'opic te pobrehetic, ma ba ya sp'aj te mach'atic yu'un te ayic ta chuquele.

³⁴¡Ac'a yalbeyic yutsil sc'oblal Jehová te ch'ulchan, bahlumilal, te maretic soc spisil bintic cuxajtic tey a!

³⁵como Dios ya me scoltay te Sión, soc ya me xcha'pasticlan te pueblohetic yu'un Judá; ya me xnahinic tey a soc ya me yu'untayic.

³⁶Te yal-snich'nab te a'batetic yu'un ya me yich'ic hilel, te mach'atic c'ux ta yo'tanic te sbihil te Dios ya me xnahinic tey a.