Read Tzeltal Salmos 71 Bible Online

Salmos 71 - Tzeltal bible

Salmos 71

¹Jnac'oj jba ta atojol Jehová, ma me ayuc bin ora ya jta q'uexlal.

²Coltayawon, ac'awon ta libre te bin ut'il toj awo'tan; ac'a tal achiquin, coltayawon.

³Ha'ucat toyol ch'entiquilat yu'un ahnibal cu'un te banti spisil ora ya xbohon. La awal mandar yu'un ya xcolon, como ha'at toyol ch'entiquilat soc ahnibalat cu'un.

⁴Dios cu'un, coltayawon loq'uel ta sc'ab te mach'a chopol, ta sc'ab te mach'a chopol yo'tan soc te j'uts'inwaneje.

⁵Como ha'at, Cajwal Jehová, smuc'ulat co'tan soc yipat co'tan c'alal ta jqueremil to.

⁶Te c'alal ayon to ta sch'uht jnan, quich'ojix quip ta atojol; ha'at te la awac' ayinucon; spisil me ora ya calbat yutsil ac'oblal.

⁷Tsobol mach'atic xcham yo'tanic ta jcuenta, pero ha'at tulan ahnibalat cu'un.

⁸Nojel que yu'un yalbeyel yutsil ac'oblal, ta sjunal c'ahc'al ya calbe sc'oblal awutsilal.

⁹Ma me xap'ajon te c'alal mamalonix a; ma me xapihteson te c'alal mayuquix quip a;

¹⁰como te jcontratac ya xc'opojic ta jcontra, te mach'atic ya sc'an ya smilonic junax ya schap sc'opic.

¹¹Hich ya yalic: Pihtesotix yu'un Dios; nutsahic, tsacahic, yu'un mayuc mach'a ya xcoltayotix yu'un, xchihic.

¹²¡Dios cu'un, ma me namaluc xawac' aba; la' me, coltayawon ta ora, Dios cu'un!

¹³Ac'a stahic q'uexlal soc ac'a yich'ic lajinel te mach'atic ya scontrahinic te jcuxlejal; ac'a stahic bayel q'uexlal soc howiyel te mach'atic yo'tanuc ya yilbonic jwocol.

¹⁴Pero te ho'on, spisil me ora ay smuc'ul co'tan, soc ta jujun buelta c'ax to xan hich ya calbat yutsil ac'oblal.

¹⁵Ta sjunal c'ahc'al ya jpucbe sc'oblal te bin stojil yac apassoc te colel awu'un, aunque ma jna' yahtalul.

¹⁶Ya xtal calbe sc'oblal te bintic muq'uic apasoj ta awu'el, Cajwal Jehová; ya cac' ta na'el te toj-o'tanil awu'un, ha nax te toj-o'tanil awu'une.

¹⁷Dios cu'un, c'alal ta jqueremil to awa'beyejon jnop, c'alal ora yacon ta yalel te jchahp a'teliletic awu'une.

¹⁸Aunque mamalonix soc saquix jol, ma me xapihteson, Dios cu'un, ha to c'alal ya calbe sc'oblal awu'el te patil ts'umbalil, ya calbe sc'oblal awip ta stojol te mach'atic patil ya xtalic,

¹⁹soc sc'oblal te toj-o'tanil awu'un, Dios cu'un, te ya xc'oht c'alal ta ch'ulchan. ¡Mero muq'uic bintic apasoj! Dios ¿mach'a c'an spajat?

²⁰Aunque awa'beyejon quil bayel jwocol soc bintic chopol, yac awa'bon xan jcuxlejal, yac acha'hachon xan tal ta sc'ubulil te q'uinale.

²¹Yac awac' muc'ubuc xan jc'oblal, soc yac acha'muc'ubtesbon xan q'uinal ca'iy.

²²Te ho'one, ya jc'ayojtaybat awutsilal soc arpa yu'un te stalel jun awo'tan, Dios cu'un; ya jc'ayojtayat ta arpa, ha'at te ch'ul Diosat yu'un Israel.

²³Ya x'awonon soc yutsil co'tan te c'alal ya jc'ayojtayat, soc ta spisil te jcuxlejal te ha'at acoltayej.

²⁴Sjunal c'ahc'al ya me yal te cac' te bin toj yac apas; como te mach'atic yo'tanuc ya yilbonic jwocol, la yich'ic q'uexlaltesel soc howijtesel.