Read Tzeltal Salmos 72 Bible Online

Salmos 72 - Tzeltal bible

Salmos 72

¹Yu'un Salomón. Dios cu'un, a'beya te ajwalil te stojil chahpanel awu'un, a'beya te snich'an ajwalil te bin stojil ay ta pasel awu'une.

²Ya me schahpambat ta stojil te pueblo awu'un, stojiluc me ya schahpan te mach'atic awu'un te ay swocolique.

³Te witsetic ya me yich'beyic tal lamal q'uinal te pueblo, te tsehletic ya me yich'ic tal te bintic toj ta pasele.

⁴Te ajwalil toj me ya schahpan te mach'atic ay swocolic ta pueblo, ya me scoltaybe te yal-snich'nab te mach'atic mayuc bin ay yu'unic, soc ya me sts'o' ta teq'uel te j'uts'inwanejetique.

⁵Te jayeb ora ay c'ahc'al soc u ya me xi'at, ta cajalcaj ts'umbalil.

⁶Te ajwalil hich me ya xc'oht te bin ut'il ha'al ta sba bojbil ha'mal, hich te bin ut'il ts'ujul te ya xyahl ta sba te lumq'uinal.

⁷Ta yorahil te ajwalil ya me xnichin te bin stojil ta pasel soc ay bayel lamal q'uinal ha to c'alal mayuquix a te uhe.

⁸Ya me scuentahin c'alal ta sti'il mar c'alal ta yan sti'il, soc ta muc'ul-ha' c'alal ta sti'il bahlumilal.

⁹Te mach'atic nahinemic ta jochol taquin q'uinal ya me squejan sbahic ta stojol, soc ya me sleq'uic ts'u'lum te scontratac.

¹⁰Te ajwaliletic yu'un Tarsis soc yu'un ti'ti'maretic ya me yich'ic tal spatanic; te ajwaliletic yu'un Sabá soc Seba, ya me yich'beyic tal mahtaniletic.

¹¹Spisil te ajwaliletic ya me squejan sbahic ta stojol; spisil te nacionetic ya me yac' sbahic ta a'batinel yu'un.

¹²Ya me scoltay te pobre te ya x'awon soc te mach'a ay swocol te mayuc mach'a ya xcoltayot yu'une.

¹³Ya me sna'be yo'bolil sbahic te pobre soc te mach'a mayuc bin ay yu'un; soc ya me scoltaybe scuxlejalic te pobrehetique.

¹⁴Ya me scoltaylan ta wocol soc ta uts'inel, como bayel sc'oblal ta yo'tan te scuxlejalique.

¹⁵¡Ac'a cuxajuc! Ac'a yich' a'beyel te oro yu'un Sabá. Ac'a yich' c'opombeyel Dios spisil ora soc ac'a yich' bendición jujun c'ahc'al.

¹⁶Ayuc me bayel trigo ta lumq'uinal, ta baba witsetic; ac'a yac' sit hich te bin ut'il ta Líbano; te mach'atic ayic ta pueblo hich ac'a nichinuc te bin ut'il ha'maletic ta lumq'uinal.

¹⁷Ac'a ayinuc spisil ora te sbihile; ac'a halajuc te c'alal ay te c'ahc'ale. Spisil te nacionetic ac'a yich'ic bendición ta scuenta, ac'a yalbeyic lec sc'oblal.

¹⁸Bayel me yutsil te Jehová Dios, te Dios yu'un Israel, te ha nax stuquel te ya spas jchahp a'teliletic.

¹⁹¡Bayel me yutsil te sbihil sbahtel q'uinal! ¡Spisil te q'uinal ac'a nojuc ta yutsilal! ¡Hichuc, hichuc!

²⁰Li' laj yo'tan ta sc'oponel Dios te David te snich'an Isaí.