Read Tzeltal Salmos 75 Bible Online

Salmos 75 - Tzeltal bible

Salmos 75

¹Yu'un jach-c'ayoj; ta sc'ayojil Ma me xajin. Ha salmo yu'un Asaf, jun c'ayoj. Ya calbatcotic wocol, Dios cu'un, ya calbatcotic wocol, como nopol ay te abihile; te ants-winiquetic ya yalbeyic sc'oblal te jchahp a'teliletic awu'une.

²Hich ya yal te Jehová: Ta yorahil cu'un ya jchahpan ta stojil.

³Te c'alal ya xnihc te lumq'uinal soc te mach'atic nahinemic tey a, ho'on ya ca'be yip te yich'o-ipique. Selah

⁴Ya calbe te jtoybahetic: Ma me xatoy abahic, xchihon, soc ya calbe te mach'atic chopol yo'tanic: Ma me toyoluc xawac' abahic;

⁵ma me xatoy abahic yu'un te bin ya xhu' awu'unic spasel, ma me xawalic toyba-c'op, xchihon.

⁶Como te stohytesel c'oblalil ma ba ya xtal ta banti ya xloc' tal c'ahc'al o ta smahlib c'ahc'al, o ta jochol taquin q'uinal,

⁷como ha jchahpanwanej te Diose; ha ya spehc'an te yane, soc ya stohytes te yane.

⁸Ay copa ta sc'ab te Jehová, pajubenix te vino soc capbilix; ha ya smal cohel, spisil mach'atic chopolic ta bahlumilal ya me slajinic yuch'el.

⁹Te ho'one ya jpuc ta halel spisil ora soc ya jc'ayojtaybe yutsil sc'oblal te Dios yu'un Jacob.

¹⁰Ya jlajimbe yip spisil jmulawiletic, pero ya me yich' toybeyel yip te mach'a toj yo'tan.