Read Tzeltal Salmos 78 Bible Online

Salmos 78 - Tzeltal bible

Salmos 78

¹Masquil yu'un Asaf. Pueblo cu'un, a'iybon awa'iy te nohptesel cu'une; a'iya awa'iy bin ya cal.

²Ya xc'opojon ta tsahbil c'opetic; ya cal te bintic muquen ayic ta namey,

³ha te bintic ca'iyejtic soc jna'ojtic, ha te bin la yalbotic te jme'jtatique.

⁴Ma ba ya jmucbetic ta stojol te yal-snich'nabic; ya calbetic te patil al-nich'aniletic te yutsil sc'oblal te Jehová, te yu'el soc te jchahp a'teliletic spasoje.

⁵Dios la ya'be mandariletic te Jacob soc la yac' te ley ta Israel, ha te la spas ta mandar te jme'jtatic te ya me ya'beyic snopic te yal-snich'nabic;

⁶scuenta yu'un hich ya sna'ic a te patil al-nich'aniletic, ha te al-nich'anetic te ya to x'ayinic, soc ha nix hich ya me ya'be snopic te yal-snich'nabique;

⁷scuenta yu'un ha ya smuc'ulin yo'tanic te Dios soc ma ba ya xch'ay ta yo'tanic te bin spasoje, te ha ya sch'uhunic spasel te mandariletic yu'un,

⁸te ma hichuquix te bin ut'il te sme'static, te jcaj ts'umbalil te tulan yo'tanic soc jtoybahetic, te mayuc yip yo'tanic ta stojol Dios soc ma ba jun yo'tanic ta stojol.

⁹Te sts'umbal Efraín, aunque yich'ojic st'ihmalte'ic, suht ta spatic ta yorahil guerra.

¹⁰Ma ba la yich'ic ta cuenta te chapbil-c'op yu'un Dios soc ma ba la sc'an la st'unic te Ley yu'une.

¹¹Ch'ay ta yo'tanic te bintic la spas, ha te jchahp a'teliletic te la ya'be yilique.

¹²Dios la spas jchahp a'teliletic ta stojol te sme'static ta sq'uinal Zoán te ay ta Egipto.

¹³La sjam te mar soc la yac' c'axuquic bahel tey a; la yac' te ya stehc'an sba te ha' hich te bin ut'il ts'ahc.

¹⁴Ta c'ahc'alel la stojobteslan bahel ta tocal, ta sjunal ahc'abal ta sts'anabul c'ahc'.

¹⁵La swuyticlan muc'ul tonetic ta jochol taquin q'uinal, la ya'be yuch'ic bayel ha' hich te bin ut'il sc'ubulil mar.

¹⁶La yac' loc'uc ha' ta muc'ul ton, la yac' cohuc bahel ha' hich te bin ut'il muc'ul-ha'.

¹⁷Pero la scha'le xan smulic ta stojol Dios; ta jochol taquin q'uinal la stoy sbahic ta stojol te Mach'a mero toyol ay.

¹⁸La stsajic te Diose, ha te la sc'an swe'ic te bin la smulan yo'tanic.

¹⁹Hich la yalic ta scontrac'optayel te Diose: ¿Ya bal xhu' ya schahpan we'elil te ya yac' ta mesa ta jochol taquin q'uinal?

²⁰La smaj te muc'ul ton, loc' bayel ha' tey a, mul ta ha' te lumq'uinal. Pero ¿ya bal xhu' ya ya'botic we'elil? ¿Ya bal xhu' ya ya'be ti'bal te pueblo yu'une? xchihic.

²¹C'alal hich la ya'iy te Jehová, ilin yu'un; tihl sc'ahc'al ta stojol Jacob, soc hahch yilimba ta stojol Israel,

²²como ma ba la sch'uhunic te Diose, soc ma ba la smuc'ulin yo'tanic te coltayel yu'une.

²³Pero Dios la spas ta mandar te tocaletic ta toyol, la sjambe te puertahetic yu'un ch'ulchan,

²⁴la yac' cohuc tal maná hich te bin ut'il ha'al yu'un la swe'ic, la ya'be trigo yu'un ch'ulchan.

²⁵Te ants-winiquetic la swe'ic pan yu'un ch'ul a'batetic; la ya'be swe'elic ha to c'alal noj sch'uhtic.

²⁶Ta ch'ulchan la yac' bahel te ic' ya xtal ta stojol banti ya xloc' tal c'ahc'al, soc ta scuenta yu'el la yic' tal ic' ta stojol sur,

²⁷la yac' yahluc cohel ti'bal ta stojolic hich te bin ut'il ts'u'lum, bayel mutetic hich te bin ut'il shi'al mar.

²⁸La yac' yahluc cohel ta yohlil te scampamentohic, ta sjoyobal te snahilpaq'uique.

²⁹La swe'ic, noj sch'uhtic yu'un, hich pasbotic yu'un Dios te bin la sc'an te yo'tanique.

³⁰Pero ma ba c'ax yo'tanic a te bin la sc'anic, ay to ta yehic a te swe'elic,

³¹c'alal tal ta stojolic te yilimba Dios, la yac' lajuc te mach'atic bayel yipic, la slajinlan te mach'atic tsahbilic ta Israel.

³²Aunque hich pasbotic, la sle xan smulic; ma ba la yich'ic ta cuenta te jchahp a'teliletic yu'une.

³³Ha yu'un Dios la slajimbe te sc'ahc'alel scuxlejalic hich te bin ut'il sahb ye, la slajimbe te ha'biletic yu'unic ta scuenta bayel xiwel.

³⁴Te c'alal ac'otic ta lajel yu'un Dios, hich hahch slehic, suhtic ta stojol, spisil yo'tanic la scha'lehic xan.

³⁵La sna'ic te ha ahnibal yu'unic te Diose, te ha J'ac'aw ta libre yu'unic te Dios te mero toyol ay.

³⁶La yutsil-c'optayic, pero la spasic ta lot;

³⁷ma ba toj yo'tanic ta stojol, ma ba jun yo'tanic ta stojol te chapbil-c'op yu'une.

³⁸Pero te bin ut'il ay sc'uxul yo'tan te Diose, la spasbe perdón yu'un te smulic, ma ba la slajinlan; bayel buelta la scom te yilimba, ma ba la yac' hahchuc spisil te yilimba.

³⁹La sna' te ha ch'ich'-baq'uetetic, te ha ic' te ya xbehen bahel te ma ba ya suhtix talel.

⁴⁰¡C'ax bayel buelta la stoy sbahic ta stojol ta jochol taquin q'uinal, la ya'beyic smel yo'tan ta jochol q'uinal!

⁴¹Bayel buelta la stsajic te Diose, la shachbeyic yo'tan te Ch'ul Dios yu'un Israel.

⁴²Ma ba la sna'ic te yu'ele, ha te bin ora ac'otic ta libre ta sc'ab te j'uts'inwanej;

⁴³te c'alal la yac' ta ilel ta Egipto te señahetic yu'un, te jchahp a'teliletic ta sq'uinal Zoán.

⁴⁴Ha la sc'atp'un ta ch'ich' te muc'ul-ha'etic, ma ba hu' la yuch'ic te ha'etique.

⁴⁵La sticombe ta stojolic bayel usetic te lajic ta ti'el yu'un, soc xch'uch'etic te lajinotic yu'une.

⁴⁶La yac' lajuc ta xetetic te sit ts'unub yawalic la yac' lajuc ta c'ulubetic te sit ya'telic.

⁴⁷La slajin ta bat te ts'usubiletic yu'unic, te higuerahetic yu'unic la slajinlan ta siquil ha'al.

⁴⁸La slajin ta bat te wacaxetic yu'unic, te chambahlametic yu'unic la slajin ta tsantsehwaletic.

⁴⁹La stihltes bahel yilimba ta stojolic, ha te sc'ahc'al yo'tan, te yilimba soc te sc'uxul wocol, ha a'batetic te ya xlajinwanique.

⁵⁰La schahpambe sbehlal te yilimba; ma ba la scoltaybe scuxlejalic ta lajel, ha la yac'ticlan ta jlajinwanej.

⁵¹La yac'ticlan ta lajel spisil te ba-alaletic yu'un Egipto, ha te sba sit te yipic ta snahilpaq'uic yu'un Cam.

⁵²La yac'ticlan loq'uel te pueblo yu'un hich te bin ut'il tuminchijetic, la yic'ticlan bahel ta jochol taquin q'uinal hich te bin ut'il jtsohb tuminchijetic.

⁵³Buen cuentahimbil bahel yu'un, hich ma ba xiwic; pero mucotic ta mar te scontrataque.

⁵⁴Patil la yic'ticlan bahel ta sti'il te sch'ul q'uinal, ta witsiltic te la stsal ta swa'el-c'ab.

⁵⁵La sloq'ueslan te nacionetic ta stojolic; la sp'isticlan ta puquel te q'uinal te ya yich'ic hilel, tey la yac' nahinuc ta snahilpaq'uic a te jujuchahp sts'umbal Israel.

⁵⁶Pero la stsajic soc la shachbeyic yo'tan te Dios te mero toyol ay, ma ba la sch'uhumbeyic spasel te mandariletic yu'une.

⁵⁷Suht ta spatic, ma junuc yo'tanic ta stojol hich te bin ut'il sme'static, hich howiyic te bin ut'il coxol t'ihmalte'.

⁵⁸La yaq'uic ilinuc Dios yu'un te toyol awilaletic yu'unic, la shahchbeyic xut'et yo'tan yu'un te loc'ombahetic yu'unique.

⁵⁹Te Dios ilin yu'un te c'alal la ya'iy, jc'axel la sp'aj ta yo'tan te Israel.

⁶⁰Ha yu'un la yihquitay te nahilpac' templo ta Silo, te nahilpac' banti nahinem ta yohlil te ants-winiquetique.

⁶¹La yac' ta chuquel bahel te seña yu'el,[24] ha te yutsilal ta sc'ab scontra.

⁶²Soc la yac' lajuc ta espada te pueblo yu'un, la yilintay te mach'atic yu'un.

⁶³Lajic ta c'ahc' te queremetic yu'unic, soc te ach'ixetic yu'unic ma ba c'ayojtaybotic c'ayojetic scuenta nuhpunel.

⁶⁴Te sacerdotehetic yu'unic lajic ta espada, te me'ba' antsetic yu'unic ma ba oq'uetayotic yu'unic.

⁶⁵Patil cux yo'tan te Cajwaltic hich te bin ut'il mach'a wayal, hich te bin ut'il ya x'awon yu'un vino te winic te ay yipe.

⁶⁶La stenticlan suhtel te scontratac; la yac'ticlan ta q'uexlal sbahtel q'uinal.

⁶⁷La sp'ajbe te sts'umbal José, ma ba la stsabe te jchahp sts'umbal Efraín;

⁶⁸ha la stsa te jchahp sts'umbal Judá, te Sión, te c'ux ta yo'tan.

⁶⁹La spas te ch'ul awilal yu'un hich te bin ut'il stoyolil ch'ulchan, hich te bin ut'il te lumq'uinal te la yac' te stalel ay.

⁷⁰La stsa David te a'bat yu'un, la sloq'ues ta yohlil jtsohb tuminchijetic,

⁷¹la yic' loq'uel ta scanantayel tuminchijetic yu'un ya scanantay te Jacob te pueblo yu'une, te Israel te ha la yu'untay.

⁷²Junax yo'tan la scanantay; soc sp'ijil yo'tan la stojobteslan bahel.