Read Tzeltal Salmos 79 Bible Online

Salmos 79 - Tzeltal bible

Salmos 79

¹Salmo yu'un Asaf. ¡Dios cu'un, te nacionetic la yochintaybatix te bintic ay awu'un! ¡La sbohlobtesbeyic sc'oblal te ch'ul Templo awu'un; busul hil yu'unic te Jerusalén!

²Te sbaq'uetalic te a'batetic awu'un la yaq'uic ta ti'el ta mutetic te ya xwihlic ta toyol; te sbaq'uetal mach'atic awu'un la yaq'uic ta ti'el ta ha'mal chambahlametic.

³La smalbeyic sch'ich'el hich te bin ut'il ha' ta sjoyobal Jerusalén, mayuc mach'a mucotic yu'un.

⁴Te jpat-xuhcotic ya slabanotcotic, ya stse'layotcotic te mach'atic ayic ta joyobalcotic.

⁵¿Bin to ora, Jehová? ¿Ya bal x'ilinat spisil ora? ¿Hich bal ya xtihl te xut'et awo'tan te bin ut'il c'ahc'?

⁶¡Mala awilimba ta stojol te nacionetic te ma sna'bat aba, ta stojol te ban c'alal ay ta cuentahinel yu'unic te ma ba ya sc'oponat ta abihile!

⁷como la slajinic te Jacob, la sjinic ta banti nahinem.

⁸Ma xawac' jmulimbecotic smulic te jme'jtatcotique. ¡Ac'a tal stahotcotic ta ora te sc'uxul awo'tan, yu'un c'ax bayel jwocolcotic!

⁹Diosat yu'un jcolelcotic, ¡coltayawotcotic ta scuenta yutsil abihil! ¡Ac'awotcotic ta libre soc pasbotic perdón yu'un te jmulcotic ta scuenta te abihile!

¹⁰¿Bin yu'un te hich ya yalic te nacionetic: ¿Banti ay te Dios yu'unic? te xchihique? ¡Ta jsitcotic a'beya yilic ta yohlil te nacionetic te yac asutbe spacol te sch'ich'el te a'batetic awu'un te la yich' malbeyel!

¹¹Ac'a c'ohtuc ta atojol te yacan te jchuqueletique; ta scuenta smuc'ul yip ac'ab coltaya te mach'atic chahpambil te ya xlajique.

¹²Soc sutbeya spacol huqueb buelta te jpat-xuhcotic yu'un te la spehc'ambat ac'oblal, Jehová.

¹³Hich te ho'otcotic, te pueblohetic awu'un, te tuminchijotcotic ta aq'uinal ya me calbe yutsil ac'oblal ta atojol spisil ora. ¡Ta jujucaj ts'umbalil ya me jc'ayojtaybatcotic yutsil ac'oblal!