Read Tzeltal Salmos 81 Bible Online

Salmos 81 - Tzeltal bible

Salmos 81

¹Yu'un jach-c'ayoj; sc'oblal Gitit. Ha salmo yu'un Asaf. ¡Tse'eluc me awo'tanic xac'ayojtayic te Dios, te ha quiptic! ¡Socuc yutsil awo'tanic awonanic ta stojol te Dios yu'un Jacob!

²Hahchanic ta c'ayoj, tijahic te pandero, te yutsil sc'op te arpa soc te lira.

³Oq'uesinahic te corneta ta yach'il u, te c'alal ya sta yorahil ya sehp sba, ta sc'ahc'alel te muc'ul q'uin cu'untique;

⁴como ha chahpambil mandar yu'un Israel, ha halbil mandaril yu'un te Dios yu'un Jacob.

⁵Ha la yac' scuenta testigo-c'op ta stojol José te c'alal loc' tal ta sq'uinal Egipto. La jca'iy c'op te ma ba jna'oj, hich la yal:

⁶La jcohtesbatix te awihcats aq'uechoj; colix ac'abic yu'un yalal te moche.

⁷Awonat te c'alal ayat ta wocol, la jcoltayat; la jac'bat ac'op c'alal ta banti ya xt'ohm tal chahwuc; la jtsajat ta ti' ha'etic yu'un Meriba. Selah

⁸A'iya awa'iy, pueblo cu'un, ay bin ya ca'bat ana'. ¡Te yacuc awa'iybon jc'op, Israel!

⁹Ma me ayuc yanl diosetic ta awohlil, ma me xanijan aba ta stojol yan dios.

¹⁰Ho'on Jehovahon, te Dioson awu'un, te la jloq'uesat tal ta sq'uinal Egipto. Jama awe, ya jnojesbat.

¹¹Pero te pueblo cu'un ma ba la ya'iybon jc'op; te Israel ma ba la yich'on ta cuenta.

¹²Ha yu'un la jquihquitay yu'un ya spasic te bin la sc'an yo'tanic, yu'un ya st'unic te snopojibal yu'unique.

¹³Te lajuc ya'iybon jc'op te pueblo cu'un, te lajuc st'umbon te behetic cu'un te Israel,

¹⁴ora nax la jcac' pehc'ajuc te scontratac soc la jcontrahin te scontratac te hichuque, xchi.

¹⁵Te mach'atic ya sp'ajic te Jehová ya me sc'ol sbahic yu'un xiwel ta stojol, soc sbahtel q'uinal ma xlaj te castigo yu'unique.

¹⁶Pero Dios ya ya'be swe'elinic mero lequil trigo te pueblo yu'un, soc ya snojesbe sch'uhtic ta chab te ya xloc' ta tontiquil.