Read Tzeltal Salmos 84 Bible Online

Salmos 84 - Tzeltal bible

Salmos 84

¹Yu'un jach-c'ayoj; ta sc'ayojil Gitit. Ha salmo yu'un te snich'nab Coré. ¡Buen t'ujbil te banti nahinemat, Jehová te acuentahinej spisil!

²¡Bayel ya smulan te jch'uhlel, mero ya sc'an co'tan te yamaq'uil Sna te Jehová! ¡Te co'tan soc te jbaq'uetal ya sc'ayojtay te cuxul Dios!

³Stahoj sna te stsohtsol, te ulich ay spechech te banti ya yac' te yalatac, nopol ta scajtajib ta chiq'uel amahtan, Jehová te acuentahinej spisil, Ajwalilat cu'un soc Diosat cu'un.

⁴¡Bayel me yutsil te mach'atic ya xnahinic ta ana; spisil ora ya sc'ayojtayat! Selah

⁵Bayel me yutsil te mach'atic ya sta yipic ta atojol, te ay ta yo'tanic te behetic awu'une.

⁶Te c'alal ya xc'axic ta Spamlej yu'un Ya'lel Sitil, ya sc'atp'unic ta sloq'uib-ha', soc te ha'al te nahil ya xtal ya snojes ta bendición.

⁷Behbe tohyel te yipique, ya me yilic te Dios ta Sión.

⁸¡A'iybon me jc'op, Jehová, Diosat te acuentahinej spisil; a'iya me awa'iy, Diosat yu'un Jacob! Selah

⁹Ilawil, Dios cu'untic, mahquilalat cu'uncotic, ilbeya sit yelaw te mach'a tsahbil awu'une.

¹⁰Ha lec te jun c'ahc'al ta amaq'uetic awu'un te bin ut'il jmil c'ahc'al ta yan lugar. Ha lec ya ca'iy te ha jcanan-puertahon ta sna te Dios cu'un, te bin ut'il te ya xnahinon ta sna te mach'atic chopolic.

¹¹Como ha c'ahc'al soc mahquilal te Jehová Dios; ha ya yac' yutsil-o'tanil soc utsilal. Ma ba ya sloq'uesbe te bin lec te mach'atic mayuc bin smulinejic.

¹²¡Jehová te scuentahinej spisil, bayel me yutsil te mach'a smuc'ulinejat yo'tane!