Read Tzeltal Salmos 88 Bible Online

Salmos 88 - Tzeltal bible

Salmos 88

¹Ha c'ayoj, jun salmo yu'un te snich'nab Coré. Yu'un jach-c'ayoj; hich ya yich' c'ayojinel te bin ut'il Mahalat. Ha masquil yu'un Hemán te ezra-winic. Jehová, Diosat yu'un te jcolel, c'ahc'al ahc'abal ya x'awonon ta atojol.

²¡Ac'a c'ohtuc ta atojol te bin ya jc'ambate! ¡A'iybon awa'iy caw!

³Como nojel ta wocol te jch'uhlel, soc nopol ayon ta yawil mach'atic chamenic.

⁴Ahtaybilon soc te mach'atic ya xcohic bahel ta muquenal; hichon te bin ut'il winic te mayuc yip,

⁵ch'aybilon hilel ta yohlil mach'atic chamenic, hichon te bin ut'il mach'a lajem ta espada te xach'al ta muquenal, ha te mach'atic ch'ayemiquix ta awo'tan, te ma ba canantaybiliquix awu'un.

⁶La awac'on ochel ta ch'en te c'ubul ay, ta sc'ubulil yihc'al q'uinal.

⁷Ay ta jtojol te awilimba, la awac' smulon cohel te yip sbehel ha'etic awu'une. Selah

⁸La awac' spihteson te mach'atic jun co'tan jba soc; la awac' te la yihlayonic; macbilon, ma xhu' ya xloc'on ta ahnel.

⁹Yac ta tup'el jsit ta scaj mel-o'tan. Jujun c'ahc'al ya jc'oponat, Jehová, ya jach jc'ab ta atojol.

¹⁰¿Ya bal awa'be yil jchahp a'teliletic awu'un te mach'atic chamenic? ¿Ya bal xhahch yalbat yutsil ac'oblal te mach'atic chamenic? Selah

¹¹¿Ya bal xhalot sc'oblal sc'uxul awo'tan ta muquenal, o ta yawil jlajinwanej ya bal yich' halel te stalel jun awo'tan?

¹²¿Na'bil bal sba ta yihc'al q'uinal te jchahp a'teliletic awu'un, o te bintic toj apasoj, ta q'uinal te ma ba na'bilix sba?

¹³Pero ya cawtayat, Jehová, ta sab ya xc'oht ta atojol te bin ya jc'oponat yu'un.

¹⁴¿Bin yu'un, Jehová, yac ap'ajbon jch'uhlel? ¿Bin yu'un yac anac' ta jtojol te asit awelaw?

¹⁵C'alal ta jqueremil to ayon ta wocol soc ayon ta sti'il te lajele; c'axem ta jtojol bintic xiweltic sba awu'un, ma xcuhchix cu'un ya ca'iy.

¹⁶C'axem ta jtojol te awilimba, ya slajinonic te bintic xiweltic sba awu'un.

¹⁷Spisil ora sjoytayejonic hich te bin ut'il snojel ha', sjoytayejonic ta jc'axel.

¹⁸La awac' namijuc ta jtojol te mach'a c'ux ta co'tan soc te mach'a jun co'tan jba soc, ha xanix jun co'tan jba soc te yihc'al q'uinale.