Read Tzeltal Salmos 92 Bible Online

Salmos 92 - Tzeltal bible

Salmos 92

¹Salmo. Ha c'ayoj yu'un sc'ahc'alel cux-o'tan. Lec te ya xhalbotat awutsilal, Jehová, te ya yich' c'ayojtayel abihil, Ha'at te mero toyol ayat;

²lec te ta sab ya yich' halbeyel sc'oblal te sc'uxul awo'tan soc ta ahc'abal ya yich' halbeyel sc'oblal te stalel jun awo'tan,

³ta scuenta sc'ayojil te decacordio soc te arpa, soc ta t'ujbil sc'op te lira.

⁴Como la awa'bon tse'el co'tan ta scuenta te a'teliletic awu'un, Jehová; soc yutsil co'tan ya xc'ayojinon yu'un te ya'tel ac'ab.

⁵¡Mero muq'uic te a'teliletic awu'un, Jehová! ¡Mero c'ubul te bintic ay ta awo'tan!

⁶Te mach'a ma sna' q'uinal ma sna'be scuentahil, te sonso ma xc'oht ta yo'tan ini:

⁷ha te c'alal ya xch'ihyic te mach'atic chopolic hich te bin ut'il ha'mal, soc te ya xnichinic spisil mach'atic ya spasic bin chopol, ya me xlajic sbahtel q'uinal.

⁸Yan te ha'at, Jehová, sbahtel q'uinal ayat ta mero toyol.

⁹Li' ay te acontratac, Jehová, ya me xlajic te acontrataque; spisil te mach'atic chopol ya'telic ya me yich'ic puhquel bahel.

¹⁰Pero ha'at hich yac atohytesbon quip te bin ut'il te yip ha'mal toro; ya quich' malel ta lequil aceite.

¹¹Ya me quil ta jsit te ya xyahlic te jcontratac; ya me ca'iy ta jchiquin sc'oblal te mach'atic chopolic te hahch scontrahinonique.

¹²Te mach'a toj yo'tan hich me ya xnichinic te bin ut'il xahn, hich ya xmuc'ubic te bin ut'il cedro ta Líbano;

¹³ts'umbilic ta sna Jehová, ya me xnichinic ta amaq'uetic yu'un te Sna te Dios cu'untique.

¹⁴Ya to sitin aunque mamalix, ay me yipic soc stalel yaxic,

¹⁵ya yalic: Ha toj yo'tan te Jehová, te muc'ul ton cu'un, mayuc bin ma stojiluc ya spas, xchihic.