Read Tzeltal Salmos 94 Bible Online

Salmos 94 - Tzeltal bible

Salmos 94

¹Jehová, ha'at Diosat te yac awa'be spacol, ha'at Diosat te yac awa'be spacol, ac'a aba ta ilel.

²¡Hahchan, Jchahpanwanejat yu'un te bahlumilal; a'beya stojol te mach'atic stoyoj sbahique!

³¿Jayeb xan c'ahc'al, jayeb xan c'ahc'al, Jehová, te tse'el yo'tanic te mach'atic chopolic?

⁴Ya xloc' bayel toyba-c'op ta yehic, ya stoy sbahic spisil mach'atic ya spasic bin chopol.

⁵Ya sjinic te pueblo awu'un, Jehová; ya ya'be swocolic te mach'atic awu'une.

⁶Ya smilic te me'ba' ants soc te jyanlum; ya slajimbeyic scuxlejalic te me'ba' alaletique.

⁷Hich ya yalic: Ma xyil te Jehová, ma sna' te Dios yu'un Jacob, xchihic.

⁸¡Na'beya scuentahil, ha'ex ta pueblo te ma xana'ic q'uinal! Ha'ex sonsohex, ¿bin to ora yac atahic sp'ijil awo'tanic?

⁹Te mach'a la spas te chiquinil ¿ma bal yacuc ya'iy? Te mach'a la spas te sitil ¿ma bal yacuc yil?

¹⁰Te mach'a ya ya'be castigo te nacionetic ¿ma bal yacuc ya'be castigo? ¿Yu'un bal ma sna' te mach'a ya sp'ijubtes te ants-winique?

¹¹Te Jehová sna'oj te bin snopoj te ants-winiquetic; ya sna' te tojol nax ayic.

¹²Bayel yutsil te mach'a ha'at yac atojobtes, Jehová, te yac ap'ijubtes ta scuenta te Ley awu'une

¹³yu'un yac awa'be scux yo'tan ta yorahil wocol, ha to c'alal ya xhotbot sch'enal te mach'a chopol yo'tane.

¹⁴Como te Jehová ma ba ya spihtes te pueblo yu'un, ma xyihquitay hilel te mach'atic yu'une.

¹⁵Te chahpanel ya xcha'suht xan ta stojol bin stojil ta pasel, soc ya xt'unot yu'un spisil mach'atic toj yo'tanic.

¹⁶¿Mach'a ya xhahch ta scontrahinel ta jcuenta te mach'atic chopolic? ¿Mach'a ya sjoquinon ta scontrahinel te mach'atic ya spasic bin chopole?

¹⁷Te manchuc la scoltayon te Jehová, ayonix ta banti ch'abal q'uinal te hichuque.

¹⁸C'alal hich la jcal: Ya xbilts'uj coc, te xchihone, la scoltayon te sc'uxul awo'tan, Jehová.

¹⁹Te c'alal ay bayel bintic ya xc'opoj co'tan yu'un, te smuc'ubtesel-o'tanil awu'un la ya'bon stse'elil co'tan.

²⁰¿Ya bal xpas te jun awo'tan soc te jmulawil huctajibal te ya spas te bin chopol ta scuenta te ley yu'une?

²¹Ya schap sc'opic ta scontrahinel te mach'a toj yo'tan, soc ya yaq'uic ta lajel te mach'a mayuc smul.

²²Yan te Jehová ha ahnibal cu'un, te Dios cu'un ha muc'ul ton te ha smuc'ulinej co'tan.

²³Ha ya ya'be stoj smulic soc ya slajinlan ta scaj te schopolilic; te Jehová Dios cu'untic ya me slajinlan.