Read Tzeltal Proverbios 1 Bible Online

Proverbios 1 - Tzeltal bible

Proverbios 1

¹Te tsahbil c'opetic yu'un Salomón snich'an David, te ajwalil yu'un Israel:

²scuenta snopel p'ijil-o'tanil soc tojobtesel; scuenta stsahtayel te bintic ay ta halel;

³scuenta yaq'uel lequil tojobtesel soc stsahtayel jbahtic, spasel bin toj, tojil chahpanel, soc pajal ya x'ich'ot ta cuenta;

⁴scuenta ya'beyel sp'ijil yo'tanic te mach'atic mayuc bin ya sna'ic, soc ya'beyel sna'ojibal soc yu'un ya sna' stsahtayel sbahic te queremetique.

⁵Ya me ya'iy te mach'a ay sp'ijil yo'tan, ay bin ya sna' xan yu'un, soc te mach'a ya sna'be scuentahil ya me yich' xan sp'ijil

⁶yu'un sna'beyel scuentahil tsahbil c'opetic soc sloc'omba c'op, te c'opetic yu'un p'ijil winic soc te bin chuhcul ta na'beyel suhtibe.

⁷Te shahchibal te p'ijil-o'tanil ha te xi'el te Jehová; te mach'atic ma sna'ic q'uinal ya yihlayic te p'ijil-o'tanil soc te nohptesele.

⁸Jnich'an, a'iybon awa'iy te nohptesel yu'un te atate, soc ma me xap'ajbe te tojobtesel yu'un te anane;

⁹como yutsil sch'ahlel ajol ya xc'oht soc uhalil ta anuc'.

¹⁰Jnich'an, teme ya sc'an ya slo'loyat te jmulawiletic, ma me xawac' awo'tan a.

¹¹Teme ya yalbat: La', joquinawotic; ya ca'iytic macliwanej yu'un ya ca'iytic milaw, ya jmacliytic te mach'a mayuc smul;

¹²cuxul me ya jbic'ticlantic hich te bin ut'il te yawil mach'atic chamenic, ya jbic'ticlantic scohtol hich te bin ut'il te mach'atic ya xch'ayic cohel ta xahab.

¹³Bayel ta chahp c'ulejaliletic ya jtahtic tey a, ya jnojestic ta pojbil biluquetic te jnatique.

¹⁴La', joquinawotic, junax jbiluctic ta jpisiltic, teme xchihique,

¹⁵ma me xat'un bahel, jnich'an; ma me xbehenat ta behetic yu'unic;

¹⁶como ya x'ahnimajic ta stojol bin chopol, ya suj sbahic ta smalel ch'ich'.

¹⁷Tojol ya yich' pasel yaquil teme yac yilbel spisil te ha'mal mutetique.

¹⁸Pero te winiquetic ini ha'ic nix ya smacliyic sch'ich'elic, ha'ic nix ya smil sbahic.

¹⁹Hich ya xc'ohtic te jbic'tal-o'tanetic, ha nix ya xlajinotic yu'un.

²⁰Te p'ijil-o'tanil ya x'awon ta callehetic, ya stoy sc'op ta plazahetic;

²¹Ya x'awon ta banti bayel mach'atic ya stsob sbahic, ta ochibaletic yu'un te pueblo ya yal te bin snopoje:

²²Ha'ex te ma xana'ic q'uinal, ¿bin to ora te yac amulanic te mayuc bin yac ana'ic? ¿Bin to ora ya smulanic labanwanej te jlabanwanejetic soc te mach'atic mayuc sp'ijil yo'tanic te ya sp'ajic bin ay ta na'el?

²³Suhtanic tal ta stojol te tojobtesel cu'un, ya me jmal ta atojol te espíritu cu'un, ya ca'beyex ana'ic te bintic jnopoj.

²⁴Ho'on la jquiq'uex tal, pero ma ba la ac'an la awa'iyic; la jach jc'ab pero mayuc mach'a la yich'bon ta cuenta.

²⁵La ap'ajic spisil bintic ya ca'beyex ana'ic soc ma la ac'an te tojobtesel cu'une.

²⁶Ha yu'un ya me xtse'ejinon te c'alal ay awocolic; ya me jlabanex te c'alal ya xtal te bin yac axi'ic,

²⁷te c'alal ya xtal xiwel hich te bin ut'il tulan ic', soc ya xtal sc'uxul wocol hich te bin ut'il sutu-ic', te c'alal ya xtal wocol ta atojolic soc mel-o'tan.

²⁸Ta hich ora ya sc'opononic, pero ma ba ya jac'be; ya me slehonic, pero ma ba ya stahonic;

²⁹ta scaj te la yihlayic te p'ijil-o'tanil, soc ma ba la stsahic te ya yich'ic ta muc' te Jehová;

³⁰ma ba la sc'anic te bin ya ca'be sna'ic soc la sp'ajic spisil te tojobtesel cu'une,

³¹hich ya me swe'beyic sit te be yu'unic soc ya xnojic ta bin chopol snopoj ta yo'tanic.

³²Como te mach'atic mayuc bin sna'ojic ya xmilotic yu'un te mayuc bin sna'ojic; soc te mach'atic ma sna'ic q'uinal ya xlajinotic yu'un te scuyoj te lec ayic.

³³Pero te mach'a ya ya'iybon jc'op jun me yo'tan ya xcuxaj stuquel, mero jun yo'tan, ma ba ya xi' te bin chopol, xchi te p'ijil-o'tanile.