Read Tzeltal Proverbios 15 Bible Online

Proverbios 15 - Tzeltal bible

Proverbios 15

¹Te t'ujbil suhtib c'op ya slahmajtes ilimba, yan te tulan suhtib c'op ya yac' tohyuc xan te ilimba.

²Ya xloc' p'ijil c'op ta ye te mach'atic p'ij yo'tanic, pero te ye te mach'atic ma sna'ic q'uinal ya yal te bin mayuc sc'oblal.

³Te sit Jehová ay ta stojol swohlol bahlumilal, yac ta yilel te mach'atic chopol yo'tanic soc te mach'atic lec yo'tanic.

⁴Te lamal c'op ha te' scuenta cuxlejal, yan te bohl c'op ya slajin te o'tanile.

⁵Te mach'a ma sna' q'uinal ya sp'aj te tojobtesel yu'un te state; yan te mach'a ya sch'uhun tojobtesel ay sp'ijil yo'tan.

⁶Ay bayel bin ay ta sna te mach'a toj yo'tan, pero te stojol ya'tel te mach'a chopol yo'tan ya yac' wocol.

⁷Te mach'atic p'ij yo'tanic ya spuquic ta halel p'ijil c'op; ma hichuc te mach'atic ma sna'ic q'uinal.

⁸Te Jehová ya yihlay te chic'bil mahtanil ya yaq'uic te mach'atic chopol yo'tanic, pero lec yo'tan yu'un te mach'atic toj yo'tanique.

⁹Te Jehová ya yihlaybe te be yu'un te mach'atic chopol yo'tanic, pero c'ux ya ya'iy ta yo'tan te mach'a st'unoj te bin toj ta pasele.

¹⁰Te mach'a ya yihquitay te lequil be, tulan me tojobtesel ya yich'; te mach'a ya sp'aj te tojobtesel ya me xlaj.

¹¹Te yawil mach'atic chamenic soc te yawil jinel jamal chicanic ta stojol Jehová, ¿ha'uc to balix a te yo'tanic te ants-winiquetique?

¹²Te jlabanwanej ma lecuc yo'tan yu'un te mach'a ya xtsitsot yu'un; ma ba ya sjoquin te mach'atic p'ij yo'tanique.

¹³Te tse'el-o'tanil ya yac' te ya stse'ejin te sit yelaw, pero te bin c'ux ya ya'iy te o'tanil ya yac' mel-o'tan.

¹⁴Te o'tanil te p'ij, ha ya sle te bin ay ta na'el, yan te ye te mach'atic ma sna'ic q'uinal ya swe' te bin mayuc sc'oblal.

¹⁵Spisil c'ahc'al ay swocol te mach'a pich'il yo'tan, yan te mach'a tse'el yo'tan spisil ora ay ta q'uin ya ya'iy.

¹⁶Ha lec xan te jteb nax bin ay cu'untic soc te ya jxi'tic te Jehová te bin ut'il bayel c'ulejalil te banti ay wocol.

¹⁷Ha lec xan te swe'el itaj soc c'uxul-o'tanil te bin ut'il juhp'en wacax te banti ay il-o'tantayel.

¹⁸Te c'ahc'al winic ya shach c'op, yan te mach'a ma ba ya x'ilin ta ora ya slahmajtes c'op.

¹⁹Te be yu'un te mach'a ch'aj, nojel ta ch'ix, yan te be yu'un te mach'a toj ha muc' jamal.

²⁰Te querem te p'ij yo'tan ya ya'be yutsil yo'tan te stat; yan te querem ma sna' q'uinal ya sp'aj te snane.

²¹Te mach'a ma ba p'ij yo'tan, ay yutsil yo'tan yu'un te bintic mayuc sc'oblal; yan te mach'a p'ij yo'tan ya stsahtay te be yu'une.

²²Ta banti mayuc j'ac'-o'tanil ya xch'ay te bin ya yich' chahpanel; pero lec ya xc'oht ta loq'uel teme ay tsobol j'ac'-o'taniletique.

²³Tse'el yo'tan te mach'a ya stahbe lec suhtib c'op; soc buen lec te c'op te ya yich' halel ta mero yorahil.

²⁴Te sbehlal cuxlejal mohel ya xbaht yu'un te mach'a p'ij yo'tan; hich ma ba cohel ya xbaht ta yawil mach'atic chamenic.

²⁵Te Jehová ya sjimbe sna te mach'atic jtoybahetic, pero ya scanantay te bin a'bot yich' te me'ba' antse.

²⁶Te Jehová ya yihlay te bintic snopoj te mach'atic chopolic, pero ya smulambe sc'opic te mach'atic sac yo'tanique.

²⁷Te mach'a ay sbic'tal yo'tan ha nix ya sjin sna, yan te mach'a ya sp'aj te ya schon sba, ya me xcuxaj.

²⁸Te mach'a toj yo'tan ya snop bin ut'il ya ya'be suhtib, pero chopol bin ya xmal loq'uel ta ye te mach'a chopol yo'tane.

²⁹Te Jehová namal ay ta stojol te mach'atic chopolic, pero ya ya'iybe sc'op te mach'atic toj yo'tanic.

³⁰Te stse'elil sit yelaw, ya yac' tse'el-o'tanil; soc te bin lec ta a'iyel ya ya'be yich' xan yip te baquetique.

³¹Te mach'a ya ya'iy te tojobtesel scuenta cuxlejal, ya sjoquin ta nahinel te mach'atic p'ij yo'tanique.

³²Te mach'a mayuc scuentahil ta yo'tan te tojobtesel ha nix ya sp'aj sba, yan te mach'a ya ya'iy te tojobtesel ya sta sp'ijil yo'tan.

³³Te xi'el te Jehová ha nohptesel yu'un p'ijil-o'tanil, soc ha nahil te peq'uel-o'tanil, patil te ich'el ta muc'.