Read Tzeltal Proverbios 16 Bible Online

Proverbios 16 - Tzeltal bible

Proverbios 16

¹Ay ta scuenta ants-winiquetic te ya snopic bintic ya spasic, pero ay ta scuenta Jehová yalel teme ya xc'oht ta pasele.

²Spisil te behetic yu'un te ants-winiquetic lec c'ohem ta yo'tanic, pero te Jehová ya stsahtay te bin yu'un te hich ya spase.

³A'beya ta sc'ab Jehová te bintic yac apas, hich me ya xc'oht ta pasel te bin chapal awu'une.

⁴Ay scuentahil yu'un Jehová spisil bintic spasoj, ha nix hich la yich' pasel te mach'a chopol yo'tan yu'un ya xlaj ta yorahil jinel.

⁵Te Jehová ya yihlay spisil mach'atic ya stoy sbahic; fuersa me ya yich' castigo.

⁶Ta scuenta sc'uxul-o'tanil soc smelelil ay ta pasel perdón yu'un mulil; soc ta scuenta xi'el te Jehová ya sq'uej sba te winic ta stojol te bin chopole.

⁷Te c'alal lec yo'tan Jehová yu'un te behetic yu'un te winic, ya yac' te ya xlahmaj yo'tanic te scontratac ta stojol.

⁸Ha lec xan teme jteb nax bin ya sta ta scuenta stojil ta pasel te bin ut'il bayel bintic ya sta te ma stojiluc.

⁹Te ants-winic ya snop ta yo'tan te bin ya spas, pero ya xtojobtesot yu'un Jehová banti ya xbehen.

¹⁰Te ajwalil ya yal te bin ya xhalbot yu'un Dios, ma xhowiy ta c'op ta schahpanel.

¹¹Yu'un Jehová te ts'acal ta p'isel yalal; ha ya'tel stuquel spisil te sp'isojibaletique.

¹²Te ajwaliletic ya sp'ajic te bin chopol ta pasel, como ya yich' yip te shuctajib ta scuenta spasel bin toj.

¹³Te ajwaliletic lec ya ya'iyic te bin toj ta halel; c'ux ta yo'tanic te mach'a stojil ya xc'opoj.

¹⁴Ya yal bahel lajel te yilimba ajwalil, te mach'a ay sp'ijil yo'tan ya slahmajtes.

¹⁵Te stse'ejil sit yelaw te ajwalil ha seña cuxlejal; te slequil yo'tan, hich c'ohem te bin ut'il tocal ta sq'uepelal q'uinal.

¹⁶Ha lec xan te slehel p'ijil-o'tanil te bin ut'il lequil oro, soc ha lec xan stahel sna'beyel scuentahil te bin ut'il plata.

¹⁷Te be yu'un te mach'atic toj yo'tanic parte ay yu'un te bin chopol; te mach'a ya scanantay te be yu'un, ya scanantay scuxlejal.

¹⁸Ha nahil te toybahil, patil te jinele, ha nahil te toybahil, patil te yahlele.

¹⁹Ha lec xan te peq'uel yo'tan ta yohlil te pobrehetic te bin ut'il spuquel bintic pojbil ta stojol mach'atic jtoybahetique.

²⁰Te mach'a ya yich' ta cuenta te c'op ay bintic lec ya sta yu'un, soc bayel yutsil te mach'a smuc'ulinej yo'tan te Jehová.

²¹Te mach'a ay sp'ijil yo'tan ya xhalbot te ay sp'ijil, soc te schi'il c'op ya yac' te lec ya xc'oht ta o'tanil.

²²Te sna'beyel scuentahil ha sloq'uib-ha' scuenta cuxlejal yu'un te mach'a yich'oje, pero te nohptesel yu'un te mach'a ma sna' q'uinal, tojol ya xc'oht.

²³Te yo'tan te mach'a ay sp'ijil ya stojobtes te sc'op, soc ya yac' te ay yutsilal te bin ya yal.

²⁴Te c'opetic te t'ujbil ta a'iyel hich c'ohemic te bin ut'il chab ta schabec'al, ya xchi'ub ch'uhlelal yu'un soc ha pox yu'un te baquetique.

²⁵Ay be te scuyoj te toj ya yil te winique, pero ya xc'oht ta loq'uel ta lajel.

²⁶Te mach'a yo'tanuc ya xwe', ha ya sujot ta a'tel yu'un; te wi'nal ya xtenawan bahel ta a'tel.

²⁷Te mach'a chopol yo'tan ya snop schahpanel te bin chopole, te c'opetic yu'un hich c'ohem te bin ut'il c'ahc'.

²⁸Te chopol winic ya shach c'op, soc te mach'a ya xlehawan ta c'op ya ya'be spit sbahic te mach'atic mero jun yo'tan sbahique.

²⁹Te j'uts'inwanej ya slo'loy te spat-xuhc soc ya yic' bahel ta ma lequil behuc.

³⁰Te mach'a ya smuts' sit yac ta snopel te bin ma lecuc; te mach'a ya smac ye, spasojix a te bin chopole.

³¹Te mach'a saquix sjol ha scorona te ich'el ta muc'; ay ta tahel ta scuenta spasel te bin toj.

³²Ha lec xan te mach'a ma x'ilin ta ora te bin ut'il mach'a ay yip, lec xan te mach'a ya xhu' yu'un scomel sba te bin ut'il te mach'a ya stsal jun pueblo.

³³Te winiquetic ya spasic seña ta na'el, pero ay ta scuenta Jehová yaq'uel ta na'el.