Read Tzeltal Proverbios 17 Bible Online

Proverbios 17 - Tzeltal bible

Proverbios 17

¹Ha lec xan te taquin we'elil ta banti ay lamal q'uinal te bin ut'il te na te nojel ta we'elil te banti ay bayel c'op.

²Te a'bat te ay sp'ijil yo'tan ya me scuentahin te nich'anil te q'uexlaltic sba, soc pajal ya yich' soc te sbanquiltac te bin ya x'a'bot yich'ic hilel yu'un te state.

³Te plata ya xtsajot ta banti ya yich' uhltesel, te oro ya xtsajot ta horno, pero te Jehová ya stsaj te o'tanile.

⁴Te mach'a chopol, ya ya'iybe sc'op te mach'a chopol bin ya yal; te mach'a jlot, ya ya'iybe sc'op te mach'a chopol te sc'ope.

⁵Te mach'a ya slaban te pobre ya yil-o'tantay te Jpaswanej yu'un, te mach'a tse'el yo'tan yu'un wocol, ya me yich' castigo yu'un.

⁶Te corona yu'un te mamaletic, ha te smamatac, soc te yutsilal te al-nich'anetic, ha te sme'statique.

⁷Te t'ujbil c'op ma ha'uc yu'un te mach'a ma sna' q'uinal, ¡c'ax to xan hich ma ha'uc yu'un príncipaletic te lote!

⁸Te mahtanil taq'uin sjel ta lequil ton te ay yip ya ya'iy te mach'a ya yaq'ue; bayuc ya xbaht, ay bin ya sta a.

⁹Te mach'a ya slajintay te bin chopol halbot, yac ta slehel bin ut'il ya sc'uxultay sbahic, yan te mach'a ya spuc bahel ta halel, ya yac' ya spit sbahic te mach'atic c'ux ya ya'iy sbahique.

¹⁰Te mach'a ay sp'ijil yo'tan c'ax hich ya yich' ta cuenta a te tsitsel te bin ut'il ho'winic buelta ya yich' majel te mach'a ma sna' q'uinal.

¹¹Te jch'ay-mandar ha nax ya sle bin chopol; ya xticonot bahel j'uts'inwanej ta scontrahinel.

¹²Ha lec xan yac ata aba soc me' oso te elc'ambil yalatac te bin ut'il yac ata aba soc te jsohquejol ta sohqueholal.

¹³Te mach'a ya sut ta bin ma lecuc te bin lec, ma x'ihquitaybot sna yu'un te bin chopole.

¹⁴Te shachel c'op hich c'ohem te bin ut'il ya yich' malel loq'uel ha' ta yawil; ha yu'un ihquitaya te hach-c'op te ma to ba schucoj sba a.

¹⁵Te mach'a ya yac' ta libre te mach'a ay smul, soc te mach'a ya yac' ta lajel te mach'a mayuc smul, ihlaybil schebal yu'un te Jehová.

¹⁶¿Banti ya xtuhun taq'uin ta sc'ab te mach'a ma sna' q'uinal yu'un ya sman p'ijil-o'tanil, teme ma sna' snopele?

¹⁷Te mach'a jun yo'tan sbahic, spisil ora ay sc'uxul yo'tan, soc hich c'ohem te bin ut'il sbanquil ta yorahil wocol.

¹⁸Te mach'a ma sna' q'uinal ya sbetan soc ya stehc'an sba ta majan yu'un te spat-xuhc.

¹⁹Te mach'a ya smulan hach-c'op, ha ya smulan sc'axuntayel mandar; soc te mach'a jc'axel ya sjam sti'il sna, ha nix ya sle sjinel.

²⁰Te mach'a chopol yo'tan, mayuc bin ora ya sta te bin leque; te mach'a ya ya'iy lot, ya xyahl ta bin chopol.

²¹Te mach'a ya snich'antay te mach'a ma sna' q'uinal, ya x'a'bot mel-o'tan yu'un; te tatil yu'un te mach'a ma sna' q'uinal, mayuc stse'elil yo'tan.

²²Ha lequil pox te tse'el-o'tanil, yan te mel-o'tan ya xtaquij baquetic yu'un.

²³Te mach'a chopol yo'tan muquen ya schon sba yu'un sbohlobtesbeyel sbehlal te stojil chahpanel.

²⁴Chican p'ijil-o'tanil ta sit yelaw te mach'a ya sna' q'uinal, pero te sit te mach'a ma sna' q'uinal bayuc ya xbaht c'alal sti'il bahlumilal.

²⁵Te nich'anil ma sna' q'uinal, ya ya'be smel yo'tan te state soc ya yac' pihch'ajuc yo'tan te mach'a ayintesot yu'une.

²⁶Ma lecuc ya yich' c'ambeyel multa te mach'a mayuc smul, o te ya yich' majel te mach'a ich'bil ta cuenta te ya spas te bin toj.

²⁷Ay sp'ijil yo'tan te mach'a ma ba bayel ya xc'opoj, soc te mach'a ya sna' q'uinal, ha lamal yo'tan.

²⁸Te mach'a ma sna' q'uinal, teme ma ba ya xc'opoje, ya xcuyot te ay sp'ijil yo'tan; te mach'a ya smac ye ya xcuyot te ya sna' q'uinal.