Read Tzeltal Proverbios 19 Bible Online

Proverbios 19 - Tzeltal bible

Proverbios 19

¹Ha lec xan te pobre te mayuc bin ay ta scuenta te bin ut'il te mach'a ma sna' q'uinal soc te chopol bin ya yale.

²Ma lecuc te mach'a mayuc snopojibal yu'un, soc te mach'a ya suj sba, ya xhowiy.

³Te sonsohil te winic ha ya xhowiytesot ta be yu'un, patil ya yilintay te Jehová.

⁴Te c'ulejalil ya yic' tal tsobol yamigotac, yan te pobre ya x'ihquitayot yu'un te yamigo.

⁵Ya me yich' castigo te lotil testigo, soc ma ba libre ya xc'oht te mach'a ya ya'iy lot.

⁶Tsobol mach'atic ya slehic te ha lec yo'tan yu'un te mach'a bayel bin ya yac', soc spisilic ha yamigotac te mach'a ya xmahtanteswan.

⁷Te mach'a pobre, teme ya x'ihlayot yu'un spisil yermanotac, ¡c'ax to xan hich ya x'ihquitayot yu'un te yamigotaque! ya sle soc sc'op pero ma sta ta lehel.

⁸Te mach'a ya sta te snopojibal yu'un, ha nix c'ux ya ya'iy sba; te mach'a ya scanantay te bin ay ta na'el, ya sta yutsil slequil.

⁹Ya me yich' castigo te lotil testigo, soc ya me xlaj te mach'a ya ya'iy lot.

¹⁰Ma snuhp'in te ya xnahin ta yohlil bayel bintic t'ujbil te mach'a ma sna' q'uinal, c'ax to xan hich a te a'bat te ya scuentahin príncipaletic.

¹¹Te sp'ijil yo'tan te winic, ha ya xcombot yilimba yu'un; soc ha yutsilal ya xc'oht te ya xcuhch yu'un te il-o'tantayele.

¹²Te yilimba te ajwalil hich ay te bin ut'il yaw choj, yan te yutsil yo'tan, hich ay te bin ut'il ts'ujul ta aquiltic.

¹³Te querem te ma sna' q'uinal, ya ya'be swocol te state; te yutaw te ants pajal soc t'ojob te spisil ora xt'ult'on.

¹⁴Te na soc te c'ulejalil ha te bin ya x'a'bot yich' yu'un sme'stat, yan te ants yic'oj te ay sp'ijil yo'tan, ha mahtanil yu'un Jehová.

¹⁵Te ch'ajilal ya yac' te ya xc'ub wayel yu'un, soc te mach'a ch'aj, ya xtal swocol ta wi'nal yu'un.

¹⁶Te mach'a ya sch'uhun spasel te mandaril ya scanantay scuxlejal, yan te mach'a ya sp'aj te behetic yu'un, ya me xlaj.

¹⁷Te mach'a ay bin ya ya'be te pobre, ha ya ya'be smajan Jehová c'ohem; ha ya suht ta stojol te bin lec spasoje.

¹⁸Tojobtesa te anich'an te c'alal ya to xhu' ta tojobtesel; pero ma jc'axeluc xawac' te hich ya xjihn yu'un.

¹⁹Te mach'a bayel ya x'ilin, ya me yich' castigo yu'un; teme yac acoltay ta castigo, yac awac' te chopol xan ya xc'oht.

²⁰A'iya awa'iy te bin ya x'a'botat ana' soc ich'a te tojobtesel, hich me p'ij ya xc'ohat te jayeb xan c'ahc'al cuxulat.

²¹Bayel bintic ya schap ta yo'tan te winique, pero ha ya xc'oht ta pasel te bintic schapoj te Jehová.

²²Te bin ya sc'an ta stojol te winique, ha te stalel jun yo'tan ta stojol yantic; ha lec xan te pobre te bin ut'il mach'a ya ya'iy lot.

²³Te xi'el te Jehová ya yac' cuxlejal: te mach'a hich yo'tan, ma ba ya xtahot yu'un te bin chopole.

²⁴Te mach'a ch'aj ya yotses sc'ab ta plato, pero ma ba ya sta c'ohel ta ye.

²⁵Maja te jlabanwanej, hich ya yich' sp'ijil te mach'a ma sna' q'uinal; teme yac atojobtes te mach'a p'ij yo'tan, hich ya snop xan a te bin ay ta na'el yu'un.

²⁶Te mach'a ay bin ya yelc'ambe te stat soc te ya sten bahel te snan, ha querem te ya yac' q'uexlal soc wocol.

²⁷Jnich'an, teme yac awihquitay ya'iyel te nohptesel, ya xhowiyat ta stojol te bin ay ta na'el.

²⁸Te lotil testigo ya slaban te tojil chahpanel; te ye te mach'a chopol ya sbic' te bin chopole.

²⁹Chapalix te castigo ya yich' te jlabanwanejetic, soc ya yich' majel ta spat te mach'atic ma sna'ic q'uinal.