Read Tzeltal Proverbios 20 Bible Online

Proverbios 20 - Tzeltal bible

Proverbios 20

¹Ha jlabanwanej te vino, soc hach-c'op te pajubtesbil uch'balil; mayuc sp'ijil yo'tan te mach'a ya xhowiytesot yu'un.

²Te sc'ahc'al yo'tan te ajwalil hich c'ohem te bin ut'il yaw choj; te mach'a ya shachbe yilimba, ha nix ya yuts'in sba.

³Ha lec sc'oblal te mach'a ma sc'an c'op, pero mach'ahuc a te ma sna' q'uinal ya shach te c'ope.

⁴Te mach'a ch'aj ma schahpan sq'uinal ta yorahil scomil c'ahc'al; hich ta yorahil stsobel sit, ya sle, pero mayuc bin ya sta.

⁵Te bin snopoj ta yo'tan te winic, ha sc'ubulil ha' c'ohem, pero te mach'a p'ij yo'tan ya sloq'ues tal.

⁶Ay tsobolic ya yal sbahic te lec yo'tanic; pero te winic te jun yo'tan ¿mach'a ya sta?

⁷Te mach'a toj yo'tan mayuc bin ay ta scuenta, bayel yutsil te yal-snich'nab ta patil yu'un.

⁸Te ajwalil te ya shuhcan sba ta chahpanwanej, c'alal ya x'ilawan, ya sloq'ues spisil bintic chopol.

⁹¿Mach'a ya xhu' ya yal: Jpocojix te co'tan, pocbilonix yu'un jmul, te xchihe?

¹⁰Te yalal soc te sp'isojibal te ma ts'acaluc, ta schebal ihlaybil yu'un Jehová.

¹¹Aunque tut querem, na'bil sba yu'un te bintic ya spas, teme lec soc toj te bin ya spase.

¹²Te chiquinil te ya ya'iy c'op soc te sitil te ya yil q'uinal, ta schebal pajal pasbil yu'un Jehová.

¹³Ma me bayeluc xamulan wayel scuenta yu'un ma ba ya yac'at ta pobre; wihc'a asit, hich me bayel pan yac awe' a.

¹⁴Te mach'a ya xmambaj: Ma lecuc, ma lecuc, xchi, pero te c'alal ya xloc' bahel ya stoy sba yu'un.

¹⁵Ay oro soc bayel t'ujbil tonetic, pero te bin ya yal te mach'a ay sp'ijil yo'tan, c'ax t'ujbil ton c'ohem.

¹⁶Ich'beya sc'u' te mach'a ya stehc'an sba yu'un sbet jyanlum; ich'beya sprenda te mach'a ya stehc'an sba yu'un sbet te ma sna'be sba.

¹⁷Buhts'an te we'elil tahbil ta scuenta lot, pero ta patil ya xnoj ye ta hi'.

¹⁸Te bintic ya yich' chapel, tulan ya xc'oht yu'un lequil j'ac'-o'tanil; ya yich' pasel guerra ta scuenta lequil tojobtesel.

¹⁹Te mach'a ya xlehawan ta c'op ya schicnajtes te bin muquen ay, ha yu'un ma me xajoquin te mach'a bayel ya xc'opoj.

²⁰Te mach'a ya sbohlc'optay sme'stat, ya xtup'bot stsumbil c'ahc' ta yihc'al q'uinal.

²¹Te bin ora nax ta tahel ta shahchibal, ma ha'uc bendición ya xc'oht ta loq'uel.

²²Ma me hichuc xawal: Ya me ca'be spacol, ma me xchihucat; mahliya te Jehová, ha me ya scoltayat stuquel.

²³Te Jehová ya yihlay te yalal te ma ts'acaluc, te ma ts'acaluc ta liquel, ma lecuc.

²⁴Te Jehová ya stojobtes bahel te jujujihm yoc te ants-winique, ¿bin ut'il c'an sna' te winic te be yu'une?

²⁵Ha syacol ya xc'oht te winic teme ma ba nopbil yu'un te bin ya sch'ultes, teme patil ya snop ta lec.

²⁶Te ajwalil te ay sp'ijil yo'tan ya sloq'ues te mach'a chopol, ya sten ta juch'el ta muc'ul sepel ton.

²⁷Ha stsumbil c'ahc' yu'un Jehová te espíritu yu'un ants-winic, ha ya stsahtay c'alal ta sc'ubulil te yo'tane.

²⁸Te c'uxul-o'tanil soc te bin smelelil, ha ya scanantay te ajwalil, ya yich' yip te shuctajib ta scuenta c'uxul-o'tanil.

²⁹Te yutsilal te queremetic, ha te yipic, te st'ujbilal te mamaletic, ha te sacal sjolic.

³⁰Te majel te ya x'ehchenteswan ha spoxil te mach'a chopol; te majel ya spoc te o'tanile.