Read Tzeltal Proverbios 25 Bible Online

Proverbios 25 - Tzeltal bible

Proverbios 25

¹Ha nix ini te tsahbil c'opetic yu'un Salomón, te lop'taybil ta ts'ihbayel yu'un te winiquetic yu'un Ezequías, te ajwalil yu'un Judá:

²Ha yutsilal Dios te ay bin ya smuc; ha yutsilal te ajwaliletic te ya sle yil te bin mucul aye.

³Te stoyolil ch'ulchan, te sc'ubulil te bahlumilal, soc te bintic ay ta yo'tan te ajwaliletic, ma xhu'ic ta na'el.

⁴Loq'uesbeya te ya'baquil te plata, hich ya xhu' ya spas ta vaso a te jten-taq'uine.

⁵Loq'uesa ta stojol te ajwalil te mach'a chopol, hich te shuctajib ya me yich' yip ta scuenta bin stojil ta pasel.

⁶Ma me xatoy ac'oblal ta stojol te ajwalil, soc ma me xawotses aba ta yohlil mach'atic muc' ya'telic,

⁷como ha lec xan te hich ya xhalbotat: Mohan tal li'i, te xchihe, te bin ut'il te yac awich' pehc'anel ta stojol te príncipal. Te bin awiloj ta asit

⁸ma orahuc yac awich' ochel ta chahpajibal, manchuc hich ya xc'oht ta patil te ma ba yac ana' bin yac apas te c'alal ya yac'at ta q'uexlal te apat-axuhc.

⁹Chahpana te c'op soc te apat-axuhc, ma me xawalbe yan te bin muquen ay,

¹⁰repente ya sq'uexlaltesat te mach'a ya ya'iyat, hich ma xhu' ta lecubtesel te chopol ac'oblal.

¹¹Te c'op ya yich' halel ta mero yorahil, hich c'ohem te bin ut'il manzana pasbil ta oro te ch'albil ta plata.

¹²Hich te bin ut'il ch'ocowil pasbil ta oro, o te uhalil pasbil ta t'ujbil oro, hich ay te tsitsel yu'un te mach'a ay sp'ijil yo'tan ta stojol te mach'a ya sna' ya'iyel.

¹³Hich te bin ut'il te siquil te me'sic ta yorahil stsobel sit, hich ay te jal-c'op ta stojol te mach'a ticombil yu'une; ha ya ya'be xan yip yo'tan te yajwale.

¹⁴Hich te bin ut'il tocaletic soc ic' te mayuc ya'lel, hich ay te mach'a ya stoy sba yu'un te mahtanil te ma ba yac'oje.

¹⁵Ta scuenta hal smahliyel ya xc'oht ta yo'tan te príncipal, como te lamal c'op ya xhu' ya swuy te baquetique.

¹⁶Teme la ata chab, p'isbil nax yac alo', teme bayel yac alo' ya ya'bat xe.

¹⁷Ma me bayeluc buelta ya x'ochat ta sna te apat-axuhc, ya wan xc'ax yo'tan awu'un, hich ya yihlayat.

¹⁸Te mach'a ya yal lotil testigo-c'op ta scontrahinel te spat-xuhc, hich c'ohem te bin ut'il martillo, cuchillo, o ya'tejibal t'ihmalte' te jay sni'ile.

¹⁹Teme ha smuc'ulinej awo'tan ta yorahil wocol te mach'a ma junuc yo'tan, hich c'ohem te bin ut'il wuyem baquel ehal soc waq'uem ocal.

²⁰Te mach'a ya sc'ayojtay c'ayojetic ta stojol te mach'a ay ta mel-o'tan, hich c'ohem te bin ut'il mach'a ya sloq'uesbe sc'u' ta yorahil sic, o te ya yich' malel vinagre ta yehchen.

²¹Teme ay swi'nal te acontra, a'beya swe'el; teme taquin yo'tan, a'beya yuch' ha'.

²²Teme hich yac apas, sjel te yac abusambe c'ahc'al ac'al ta sjol, soc ha ya stojbat stuquel te Jehová.

²³Te ic' ya xtal ta norte ya yic' tal ha'al; ha nix hich te labanwanej ya yac' chicnajuc ilimba ta sit yelaw.

²⁴Ha lec xan te nahinel ta xuhc ba na te bin ut'il sjoquinel ta muc'ul na te ants te bayel ya x'utawan.

²⁵Hich te bin ut'il siquil ha' ta stojol te mach'a taquin yo'tan, hich c'ohem te bin lec ta a'iyel te ya xtal ta namal q'uinal.

²⁶Hich te bin ut'il sloq'uib-ha' te tatubenix o hotbil ch'en te ay yabacul, hich ay te mach'a toj yo'tan te ya xnihc yo'tan ta stojol te mach'a chopole.

²⁷Ma lecuc ta lo'el bayel chab, ha nix hich ma lecuc te ha nix ya sle yutsil sc'oblal.

²⁸Hich te bin ut'il pueblo te jihnem sts'ahcul, hich ay te mach'a ma sna' scomel sba.