Read Tzeltal Proverbios 26 Bible Online

Proverbios 26 - Tzeltal bible

Proverbios 26

¹Hich te bin ut'il me'sic ta yorahil sq'uepelal q'uinal, o te ha'al ta yorahil c'ajoj, ha nix hich ma snuhp'uc te ya x'ich'ot ta muc' te mach'a ma sna' q'uinal.

²Hich te bin ut'il ha'mal mut te bayuc ya xbaht, o ulich te yac ta wihlel, ha nix hich te chopol c'oblalil te mayuc scuentahil, ma xc'oht ta banti sc'oblal ya xc'oht.

³Te chicote ha yu'un te cawu, te sbolsahul sni' ha yu'un te burro, soc te xul, yu'un ya yich' majel ta spat a te mach'a ma sna' q'uinal.

⁴Te mach'a ma sna' q'uinal ma hichuc xasutbe sc'op te bin ut'il ay te sonsohile, scuenta yu'un ma pajaluc ya xc'ohat soc.

⁵Sutbeya sc'op te mach'a ma sna' q'uinal hich te bin ut'il ya sc'an te sonsohil, scuenta yu'un ma ba ya scuy sba ta p'ij.

⁶Hich te bin ut'il mach'a ya xot'ticlan yoc o te ya yich' uts'inel, hich ay te sticonel bahel c'op ta scuenta te mach'a ma sna' q'uinal.

⁷Hich te bin ut'il yacan te coxo' te hich nax jipil ay, hich ay te tsahbil c'op ta ye te mach'a ma sna' q'uinal.

⁸Hich te bin ut'il schuquel ton ta jihmuch'il, hich ay te yich'el ta muc' te mach'a ma sna' q'uinal.

⁹Hich te bin ut'il ch'ix ta sc'ab te jyacubel, hich ay te tsahbil c'op ta ye te mach'a ma sna' q'uinal.

¹⁰Hich te bin ut'il mach'a ya yac' t'ihmalte' te ya yehchentes spisil, hich ay te mach'a ya yic' ta a'tel te mach'a ma sna' q'uinal o te jbehyom.

¹¹Hich te bin ut'il ts'i' te ya suht tal ta slo'el xe, hich ya scha'pas te sonsohil te mach'a ma sna' q'uinale.

¹²¿Ay bal awiloj te mach'a ya scuy sba ta p'ij? ¡Ay xan bin lec ay ta mahliyel yu'un te mach'a ma sna' q'uinal te bin ut'il te mach'a ya scuy sba ta p'ij!

¹³Hich ya yal te mach'a ch'aj: ¡Ay choj ta be! ¡Ay choj ta callehetic! xchi.

¹⁴Hich te bin ut'il xjoyet ya xbehen te puerta, hich ya suht sba ta swayib te mach'a ch'aje.

¹⁵Te mach'a ch'aj ya yotses sc'ab ta plato, pero ya xluhb yu'un yotsesel ta ye.

¹⁶Te mach'a ch'aj ya scuy sba te c'ax hich ay sp'ijil yo'tan a te bin ut'il huctuhl te ya sna'ic suhtesel ta lec te c'ope.

¹⁷Te mach'a ya yac' sba ta c'op te ma yocheluc, hich ay te bin ut'il mach'a ya stsac ts'i' ta schiquin.

¹⁸Hich te bin ut'il mach'a sohquem sjol te ya st'im bahel ya'tejibal t'ihmalte' te ay sc'ahc'al te ya xlajinwan,

¹⁹hich ay te mach'a ya slo'loy te spat-xuhc soc patil hich ya yal: Ixta' nax la jpas, xchi.

²⁰Teme mayuc si', ya xtup' te c'ahc', te banti mayuc le-c'op, ya xlahmaj te c'ope.

²¹Hich te bin ut'il ya sc'an ac'al yu'un ya stsajub sc'ahc'al, soc te si' yu'un ya yich' nup'el c'ahc' a, hich ay te mach'a ya ya'iy tijaw ta c'op te ya shach c'ope.

²²Te sc'op te jle-c'op hich ay te bin ut'il buhts'an lequil we'elil; ya xco bahel c'alal ta sch'uht.

²³Hich te bin ut'il pac'bil oxom bombil ta plata, hich ay te t'ujbil c'op te ya xtal ta chopol-o'tanil.

²⁴Te mach'a ya x'il-o'tantaywan, ma xyac' sba ta na'el ta sc'op, pero ay ta yo'tan lo'loywanej.

²⁵Teme buen lec ya xc'opoj, ma xach'uhun, como ay huqueb bintic ilobtic sba ta yo'tan.

²⁶Aunque smucoj ta sc'op te il-o'tantaywanej, ya xchicnaj ta tsoblej te bin chopol ay ta yo'tan.

²⁷Te mach'a ya sjoc' c'ubul ch'en, ha nix ya xch'ay cohel tey a; te mach'a ya sbalch'un ton, ha nix ya xp'e'ot yu'un.

²⁸Te yac' te mach'a ya ya'iy lot ya yil-o'tantay te mach'a ya yuts'in, soc te t'ujbil c'op te ma meleluc, ya xjinawan.